Чекленнген онглары болгъан адамлагъа – энчи онгла Клиент службала бла хайырланыргъа тынч болурча

Россейни Пенсия фондуну (ПФ) регионда бёлюмю сакъат адамла анда кесини жумушларын къыйынсыз эталырларына уллу эс бурады. Аны ючюн «жол карта» деген энчи план жарашдырылгъанды. Анга кёре чекленнген онглары болгъан адамла фондну мекямларына киргенде, транспорт, связь бла хайырланнганда къаллай чурумлагъа тюбегенлери тинтиледи. 

Чекленнген онглары болгъан адамланы жашауларын женгиллендирир муратда фонд битеу управленияларында бу жаны бла халны тинтирча эм паспортизацияны бардырырча ишчи къауум къурагъанды. Анга сакъатланы жамауат организацияларыны келечилери киредиле. Бёлюмлени барысында да энчи оборудование орнатылады. Аны бла бирге ПФ кёп жумушланы «Энчи кабинетни» юсю бла электрон халда тамамларгъа боллугъун да эсгертеди.

Машинаны хакъсыз салырча жерле белгиленедиле

«Россей федерацияда сакъатланы социальный жаны бла къоруулау» деген федерал законнга 2020 жылны 1 июлюнда тюрлениуле кийирилгендиле. Алагъа кёре чекленнген онглары болгъан адамны неда сакъат сабийни элтген машинаны парковкада хакъсыз къоярча эркинликни онлайн халда алыргъа боллукъду.

Заявленияны къырал жумушланы порталында, фондну сайтында, Кёп функциялы аралада, Сакъатланы федерал реестринде (ФРИ) жазаргъа жарарыкъды. Анда машинаны номерин, маркасын эм моделин белгилерге тийишлиди.

Бу амал бла 3-чю къауумдагъы сакъатла да хайырланаллыкъдыла. Быллай эркинлик жангыз да бир машинагъа бериледи. Инсан башха транспорт алгъан эсе, заявленияны жангыдан жазаргъа тюшерикди, этген тюрлениулери реестрде 15 минутдан чыгъарыкъдыла. Эсепге сакъат адам чакъыргъан таксини окъуна салыргъа боллукъду, ол автомобильни керекли жерледе тазир салдырмай тохтатыргъа онг берликди.

Реестрге тюшген информация битеу къыралда да кючюн тас этмейди. Башхача айтханда, автомобиль анга кийирилген эсе, аны къайсы регионда да парковкалада белгиленнген жерледе хакъсыз къояргъа боллукъду.

Сакъатлагъа тёлеуле - заявлениясыз

Россейни Урунуу эм социальный къорууланыу министерствосуну буйругъуна тийишлиликде чекленнген онглары болгъан абаданлагъа бла сакъат сабийлеге ай сайын берилиучю тёлеуле заявлениясыз тохташдырыллыкъдыла. Башчаха айтханда, энди ол жумуш бла ауругъандан фондха келири изленирик тюйюлдю.

Пособияла Сакъатланы федерал реестрини (ФРИ) эсеплерине кёре инсаннга сакъатлыкъ берилгенден сора он кюнден тёленип башланырыкъдыла. Аны юсюнден билдириу адамны къырал жумушланы тамамлау порталда энчи кабинетине, электрон почтасына неда телефонуна  смс бла жиберилликди, деп билдиредиле фондну пресс-службасындан.

ФРИ-ге информация медико-социальный экспертиза учрежденияладан, бюджетден тышында фондладан, федерал министерствола бла ведомстволадан, регион эм муниципал власть органладан келеди. Пенсия фондха сакъатдан заявление келгенлей, ол битеу данныйлени ФРИ-ден кеси алады. Пособияланы берирге оноу этилгенден сора, адам пенсияны къалай алыргъа сюйгенини (почта, банк)  юсюнден заявление жазаргъа керек боллукъду, аны да къырал жумушланы порталында неда фондну сайтында электрон халда толтурургъа жарарыкъды. Инсан ары дери да пособияла алып тургъан эсе, бу заявление да изленирик тюйюлдю. 

Информация себеплик

Сакъатланы федерал реестрлери – ол сакъатлыкъ берилген битеу адамланы, ол санда сабийлени да юслеринден толу эсеплени жыйышдыргъан уллу информация системады. Сервис, документлени власть органланы араларында ташыудан эркин этип, жумушланы теркирек тамамларгъа  болушады.  

 Аны мурдорунда sfri.ru деген сайт жарашдырылгъанды. Анда, эм алгъа, сакъатны энчи кабинетине эс бурургъа тийишлиди. Аны болушлугъу бла инсан къайсы къауумдагъы сакъат болгъаны эм аурууну къаллай болумлада тапханы, анга тийишли медицина болушлукъну, социал реабилитацияны бла абилитацияны эм аланы болжалларыны, медико-социальный экспертизаны юслеринден билирге боллукъду. Андан тышында, энчи кабинетде ауругъанга тийишли пенсияны эм башха тёлеулени, къыралны жанындан этилген эм бийик технологиялы болушлукъну, санатор-курорт багъыуну, дарманла бла жалчытыуну юсюнден билдириуле бардыла, пенсияны эм социал жумушланы къауумун (НСУ) алыргъа заявленияны жазаргъа да жарарыкъды.

Энчи кабинет бла хайырналып башлар ючюн, къырал жумушланы порталында www.gosuslugi.ru эсепге тюшерге керекди. Аны бла сакъатны законлу келечилери да хайырланыргъа эркиндиле. Ол саусуз сабийни сейирлерин къоруулауну, анга тийишли жумушланы алыуну тынчыракъ этеди. Энчи кабинетге компьютер бла, телефон бла кирирге боллукъду, аны ючюн «ФГИС ФРИ» деген энчи приложение жарашдырылгъанды.

 Сервисге эсеплени Медико-социальный экспертизаны федерал бюросу, Россейни Пенсия эм Социал страхование фондлары, Саулукъ сакълау министерствосу эм башха власть органла, субъектле бередиле.

Ауругъан балаланы ёсдюргенлеге – болушлукъгъа

2019 жылдан бери пенсиягъа чыгъыуну жыл саны аз-аздан кёбейтиле башлагъанды. Алай гражданланы талай къауумуна ол тюрленмегенди, ол санда сакъат сабийлени ата-аналарына неда опекунларына да. 

 Аладан бири пенсияларына алгъа жылладача чыгъаллыкъды: анала – 50, атала – 55 жылларында. Алай алагъа да сабийни 8 жылына дери ёсдюрюрге эм страховой стажны жыяргъа (тиширыулагъа – 15 жыл, эр кишилеге – 20 жыл) борч салынады. Опекунланы юслеринден айтханда, ауругъан сабийге къарагъан 1,5 жыллары ючюн пенсия жыл санлары 1 жылгъа азайтыллыкъды, алай битеу да бирге 5 жылдан кёпге уа угъай. Сора, опекунство саусузгъа 8 жылы толгъунчугъа дери жазылыргъа керекди.

Урунургъа онгу болуп, алай сакъат баланы бакъгъаны ючюн ишге чыгъалмагъан адамгъа сабий бла тургъан заманы страховой стажгъа саналады, хар жыл ючюн анга 1,8 пенсия коэффициент къошулады.

 

Кульчаланы Зульфия хазырлагъанды.
Поделиться: