Къуллукъчу эсенг, адамлагъа тынгыла эмда аланы эшит

     Заман бла бирге жашаугъа кёп жангылыкъла кийирилгендиле, аны бла бирге  уа бир-бир ахшы тёреле да кетериле барадыла. Элни турмушу, къайгъылары шахарныкъындан иги да башха болгъанын барыбыз да билебиз.

      Жаз айлада, сёз ючюн,  эллерибизни иги кесегини  суу жетишмей къыйналгъанлары бюгюнлюкде - 21-чи ёмюрде – къужур кёрюнеди. Жылны башха кезиулеринде да чыгъа-чыгъа турадыла тюрлю-тюрлю жарсыула. Алгъын аланы юслеринден адамла сходлада айта эдиле, алай, не медет, арт жыллада  ол ахшы адет да къалгъанды. Аллай жыйылыула эллерибизде хазна бардырылмайдыла. Мен оюм этгенден, аллай тюбешиуле уа жылны ичинде бир ненча кере бардырылыргъа тийишлидиле.

      Нек эсе да шёндю киши кишиге тынгыларгъа сюймейди.  Къуллукъчула, таматала, кеслерини энчи дунияларында жашагъанларын ачыкъ кёресе. Жамауатны жарсыулары бла кюрешгенле бек аздыла. Кёпле ол къуллукълада он жылдан артыкъ туруп, чёп тенгли бир зат этмей кетгендиле.

      Сёгерге уа, терслерге уа, айхай да, кишини жарамайды. Газетден журналистле алгъын командировкалада болуп, кёргенлерин жазаргъа итиннгенде, бир-бир эллени таматалары, редакциягъа аладан алгъа жетип, жазмазларын, материал басмаланмазын тилеп кете эдиле, дуния бла бир сылтау да этип. Аллай болумгъа мен кесим да тюшген эдим. Болсада материал жазылгъан, басмаланнган да этилгенди. Кемчиликлени юслеринден суратла, шартла да бола тургъанлай, оноучула дагъыда сени терслерге кюрешедиле.

    Мен оюм этгенден, сен халкъны аллында аны жумушларына къараргъа тургъан эсенг,  салыннган борчланы толтурургъа кюн сайын итинирге керексе. Алай  жерлешлерине хыны жууап бергенле да тюбейдиле. Сёз ючюн,  жоллары осал тийрени бирине ахыр айырыулагъа дери кёп жылланы башчылыкъ этип тургъан биреу: «Башха узакъ эллени жоллары  бизникилеча аман тюйюлдюле», - дегенлеге: «Жаратмагъан вертолёт сатып алып жюрюсюн», - деп жууаплагъанды. Сора аллай оноучугъа адамла къаллай сый берирге керекдиле андан арысында?

   Къуллукъда адамла ючюн тургъанын биреу да унутмазгъа керекди. Аны бла бирге тюбешиуле къураргъа, айтылгъанны эшите билирге борчлудула. Тамата тёлюге ол бютюнда бек керекди. Хау, тузсуз-мыстысыз затла айтып тургъанла тюбемей къалмайдыла. Аллай шартла кимни да ачыуун  келтирирге боллукъдула. Алай къуллукъчу тап жууап бере билирге, айтылгъан кемчиликлени да кёрюрге, аланы кетериуню амалларын да излерге керекди.

      Кёп жумушла шахар эм район арала бла къаты байламлы болгъанлары ангылашыныулуду. Алай адам кесини ызын тута, ишин ахырына дери жетдирирге сюе эсе, уялмай, буюкъмай оноучулагъа сёлешгенлей, жумушун эслерине салгъанлай турургъа тийишлиди. Ансыз бир иш да барлыкъ тюйюлдю. Сени жарсыуларынг, жумушунг башхалагъа аз да сейир болмаз. Таулула айтыучулай, жилямагъан сабийге ёшюн салмайдыла.    

                              

                                      

Таппасханланы Аминат.
Поделиться: