Бир ауукъ замандан бери Тюркню сериаллары кёп жерлешлерибизни эслерин кеслерине бургъандыла. Сюжетлери да сейирдиле, актёрла кеслерин жюрютгенлерине къарасанг а, съёмкала баргъан майданда угъай, жашаулары былайды дерчады. Окъуучуларыбызгъа бир къауум тюрк артистлени юслеринден хапарларгъа излегенбиз. Аны къысха биографиялы халда басмалайбыз. Бек биринчи Небахат Чехреден башлайбыз.

Хиляль Небахат Чехре 15 мартда 1944 жылда Къара тенгизни жагъасында орналгъан Самсун порт арада туугъанды. Аны атасы Иззет гюржюлюдю, кеси да юрист болуп ишлегенди. Анасы Мюзейен сабийлени ёсдюргенди: Небахатны бла Орханны. 1949 жылда Иззет дуниясын алышады, анасы уа сабийле бла Стамбулгъа кёчеди. Ол анда экинчи кере эрге Тарик Йылдызгъа барады эм бир жашчыкъ табады, атына да Тайяр деп атайдыла. Небахат эсгергеннге кёре, ёге атасы алагъа эс бёле эди, алай къаты адам эди.

Уллу шахарда кесини фахмусун ачыкъларгъа да тынчыракъ болгъанды къызчыкъгъа. Школну бошай туруп ол модель агентствода кастингден ётгенди. 1959 жылда «Мисс Турция» конкурсда биринчи жерге чыгъып, гонорарына кесине ариу тёбен жан алады. 1962 жылда Стамбулда художестволу академиягъа окъургъа киреди. Жыйырма жыл болгъанда Американы Бирлешген Штатларында бардырылгъан битеудуния ариулукъну конкурсуна къатышады. Бир айны ичинде Нью-Йоркда, Вашингтонда эм Майамиде тургъанды. Тюркню эришиуге къатышыргъа эркин этмегенлери бла байламлы, къыз сценагъа чыгъалмагъанды.

Белгилилик сунмай тургъанлай келгенди. 1962 жылда ол 8 проектге къатышханды. Аны биринчи ролю «Ачыулу къадар» деген кинода Филизди. Ол ахча кёплюкден бузулгъан кесин сюйген Эндерни эгечин ойнайды. Жаш жарлы жашагъан сваркачы Мехмет юйдегили болама деп тургъан къыз бла тюбешип башлайды, алай бир айдан а аны къояды. Мехмет лотереягъа уллу ахча къытып, бай болады. Филиз бла бир ауукъ заман тюбешгенден сора, Эндерге дертими жетдирдим деп, араны ачыкъ этеди.

Сегиз жылны ичинде Небахат тынчаймай ишлегенди. Жыл сайын 5-6 кинофильмде ойнагъанды. «Кюйсюз тиширыуда» Лейланы эм «Келинлени жерлеринде» Кеджени сыфатларын бек тынгылы ачыкълагъанды жаш актриса. 1969 жылда биринчи эри – белгили режиссёр Йылмаз Гюнем бла айырылады. Андан сора бир къауум заманны Небахат бла бир режиссёр да ишлерге унамагъанды. Бир ауукъ замандан актриса «Белгисиз аскерчи» деген фильмде Алтынайны сыфатында, дагъыда бир ненча эпизод рольлада кёрюннгенди.

Небахат Чехре 1972 жылда экинчи кере эрге барады эм ишин отуз жылгъа къояды. 56 жылында «Жангы жашау» фильмде Аси Зеренни сыфатында экраннга жангыдан чыгъады. 2008 жылда «Эркинликсиз сюймеклик» деген сериалны премьерасындан сора аны иш даражасы бийикге кётюрюлгенди.

Андан бери актриса кёп сериалда ойнагъанды. Аланы бир къаууму: «Июнь айны кечеси», «Эркинликсиз сюймеклик», «Великолепный век», «Къанлы январь», «Мени жауум мени юйюмдеди» эм дагъыда башхала.

Эки баш иеси да аны чыгъармачылыкъ жаны бла кётюрюлюрге къоймагъандыла, аланы биринден да сабийи жокъду. Актриса кеси да ала бла аллай байламлыкъ болурун сюймегенин «Marie Clare» журналда интервьюсунда айтханды.