Авариягъа юч машина бирден тюшгендиле

Къырал автоинспекторла «Кавказ» федерал трассада жол-транспорт болумну сылтауларын тинтедиле.  7 мартда эрттенликде 5 сагъатда «Кавказ» федерал трассада (Пятигорск шахарны жаны бла) юч машина къагъышхандыла – «Тойота-Камри», «ГАЗ-2818» эмда «Хёндай-Солярис».

Тойотаны 34-жыллыкъ водители, Пятигорскдан Владикавказгъа бара болгъанды. Ал шартлагъа кёре, ол машиналаны араларында сакъланыргъа керекли кенгликни бузуп, Газельни арт жанындан ургъанды. Алайда ата журтлу машина сол жанына аугъанды,  «Хёндай-Солярис» келип, анга урулгъанды. Юч машина да от къабынып, кюйгендиле.

Аварияда Газельни 42-жыллыкъ водители ауур жарала алып, алайда ауушханды.  Жол-транспорт болумгъа тюшгенле башха республикаланы инсанларыдыла.   Аварияны сылтаулары тинтиледиле,  следствие-оператив къауум шартланы жыйышдыргъанды.

Аварияны хатасын кетериуге От тюшюуге къажау-къутхарыу службаны 9-чу номерли бёлюмюню къуллукъчулары къатышхандыла.