Олимпиадалагъа энчи эс бёлюнюрюкдю

5 марта, 2021 - 13:40

Алгъаракъда билдиргенибизча, белгили программист, ITV компанияны таматасы Алтууланы Муратны башламчылыгъы бла республиканы 10 школуна Москваны вузларында математикадан билим ала тургъан фахмулу студентле келип, окъуучулагъа дерсле берликдиле. Кёп болмай аланы бир ненчасы ол жумушну башлагъандыла.

Яникойда, Бабугентде, Хасанияда, Исламейде, Терек шахарда 5-7 класслада окъугъанлагъа кружокла бардырылгъандыла. Сабийлени ата-аналары Интернетде жазгъаннга кёре, ала къошакъ дерследен къууанып къайтхандыла. Педагогла сабийле бла ыйыкъгъа бир кере тюбеширикдиле эм сагъат бла жарымны ичинде ангылатыу ушакъла бардырыллыкъдыла.

Эсигизе салайыкъ, бу проектни чеклеринде окъуучуланы олимпиадалагъа хазырлау бардырылады. Бу дерследе энчи эс задачаланы толтуруугъа бёлюнеди. Яникойчу сабийле бла дерслени Джанкишиланы Тимур бардырады. Сабийлеге аны бла тюбешиу асыры сейир кёрюннгенден, ала бёлюннген заман къалай кетгенин окъуна ангыламай къалгъандыла.

Таппасханланы Аминат.
  • 24 просмотра
Поделиться: