Миллионсуз, будайсыз да къалгъанды

Республиканы инсаны 38 тонна будайны сатып алама деп, миллион сом тёлегенди. Алай сатыучуну бир тюрлю товары жокъ эди.  

Право низамны сакълаучула билдиргенлерича, былтыр ноябрьде Ростов областьны Батайск шахарыны 28-жыллыкъ инсаны Интернетде будай сатханыны юсюнден билдириуню басмалагъанды. Алай кертиси бла уа аны жугъу да болмагъанды.

Билдириуню кёрюп, нарткъалачы эр киши аны иесине жазгъанды. Ызы бла телефон бла сёлешип, 38 тонна будайны сатып алыргъа, аны Къабарты-Малкъаргъа келтирирге келишеди. Алай бла ол ростовчу белгили этген счётха миллион сомгъа жууукъ ётдюргенди. Алай не бек сакълагъан эсе да, будай республикагъа келтирилмегенди. Билдириуню иеси уа, ахчаны алгъанлай, соруулагъа жууапла бермей, телефонун алмай, жокъ болуп къалгъанды.

 Нарткъалачы аны алдагъанларыны юсюнден право низамны сакълаучулагъа билдиргенди. Оперативникле тийишли излеу жумушла толтуруп, хыйлачыны тохташдыргъандыла. Ростов областьха барып, полициячыла аны Къабарты-Малкъаргъа жетдиргендиле.

Бюгюнлюкде терсленнген Урван районда ОМВД-ны изоляторунда тутулуп турады. Полициячыла анга РФ-ни УК-сыны 159-чу статьясыны 4-чю кесегине кёре терслеу материалла ачхандыла.