Адам эм закон

Террористлени къауумунда танышлагъа болушургъа чакъыргъанды

  Былтыр январьда Къашхатаудан 20-жыллыкъ жаш адам халкъла аралы террорист организациялагъа аманлыкъчы ишлерин толтурургъа болушур мурат бла районда жашагъан тенглерин Сирия Республикада террористлени тизгинлерине къатышыргъа чакъырыула этгенди.  Ол   бу къыралда террорист къауумлада болгъан танышларын юлгюге келтирип, алагъа болушургъа кереклисин  айтханды. Дагъыда жаш адам   «Сауутланы юсюнден» федерал законнга бузукълукъ этип, уучу къауалны быргъысын кесип, аны биргесине машинада жюрютгенди.

 РФ-ни Следствие комитетини КъМР-де следствие управлениясы жаш адамгъа ачылгъан уголовный ишни сюзюп бошагъандыла. Ол РФ-ни УК-сыны 205-чи статьясыны 1-чи кесегине, 223-чю статьясыны 1-чи кесегине эмда 222-чи статьясыны 1-чи кесегине кёре терсленеди. Башхача айтханда, ол  террорист къауумланы ишлерине къатышыргъа чакъырыула этгени, сауутну тюрлендиргени эмда сауутланы асырагъаны, биргесине жюрютгени ючюн терсленеди. Материалла сюдню къараууна берилгендиле.

Ахчаны къыралдан букъдургъанды

 КъМР-ни прокуратурасы Петровых атлы колхозну башчысына ачылгъан уголовный ишни къабыл кёрюп, материалла сюдню къараууна берилгендиле.

Эл мюлкню оноучусу организацияны кёп санда файдаларын букъдургъана ишеклик барды. Бу ахчадан налогла тёленирге керек эдиле. Анга РФ-ни УК-сыны 199.2-чи статьясыны 2-чи кесегине кёре терслеу материалла ачылгъандыла. 

 Следствие тохташдыргъаныча, колхозну башчысыны РФ-ни бюджетине эм бюджетден тышында фондлагъа тёленмей къалгъан налогланы берирге онгу болгъанды. Алай 2019 жылда 10 сентябрьден 2020 жылда 29 майгъа дери кезиуде, тюрлю-тюрлю операцияла бардырып, ол 9 миллион сомдан асламны букъдургъанды. Битеу да бирге къыралгъа тёленирик налогну ёлчеми 20 миллион сом болгъанды.

Къыралгъа этилген къоранчланы къайтарыр мурат бла мюлкню 11,5 миллион сом багъасы ырысхысына арест салыннганды.

Хыйлачыла  392 минг сом къоллу болгъандыла

Бир кюнню ичинде республиканы юч инсаны хыйлачылагъа ийнанып, ахчаларын тас этгендиле. Битеу да бирге алагъа 392 минг сом къоранч салыннганды.

39-жыллыкъ урванчы интернетде атланы тишлерин багъыуда керекли оборудование сатылгъаныны юсюнден билдириуню кёргенди. Ол аны иесине 14 минг сомну жибергенди. Алай ахча тёленнгенлей, билдириуню басмадан кетерип, аны иеси уа жууап бермей къойгъанды.

Заюководан 24-жыллыкъ тиширыу а къышхыр сатылгъаныны юсюнден билдириуню кёрюп,  148 минг сомну тёлегенди. Алай билдириуню иеси да ахча къолгъа болгъанлай, билдириуню кетерип, кеси да тас болуп къалгъанды.  26-жыллыкъ нальчикчи тиширыугъа уа ол танымагъан биреулен сёлешгенди. Ол жангы тюкен ачылады, анга ахча къошаргъа боллукъду деп алдап, кесини счётуна  230 минг сомну ийдиргенди.

Республиканы право низамны сакълаучулары инсанланы сакъ болургъа чакъырадыла. Хыйлачыла интернетде товарны багъасын учуз кёргюзтюрге ёчдюле. Анга алданып, адамла ахчасыз къаладыла. Сатыучугъа ишекли болсагъыз, товар ючюн ахчаны тёлемегиз. Интернетде къысха заманны ичинде байыкъланыргъа болушабыз дегенлеге да ийнанмагъыз.