Жашау журтлагъа танг къошулады

КъМР-ни Къурулуш, архитектура эмда жашау журт –коммунал мюлк министерствосундан билдиргенлерича, быйыл 528 минг квадрат метр жашау журт ишленирикди.  Ол санда «Мэй» эм «Нарт» микрорайонлада 150 минг квадрат метр.  

Быйыл он айгъа 323,3 минг квадрат метр салыннганды. Былтыр бу заман бла тенглешдиргенде ол  9,8 процентге асламды.  Андан сора да, жашау журтла бла байламлы   къыйматлы программалагъа кёре 113,9 минг квадрат метр ишленирикди.  Ол да алгъын кёрюмдюледен 75,9 процентге асламды.  

Быйыл «Стимул» программаны чеклеринде  «ЛИДЕР» къурулуш компания Нальчикде суу баргъан ызланы эм  сооруженияланы жарашдырады. Саулай ишлеге 180,4 миллион сом къоратыллыкъды, андан  178,55 федерал бюджетден бёлюнюрюкдю эм республика да кесинден  1,8 миллион  сом къошарыкъды. Бюгюнлюкде 166,6 миллион сом багъасына жумуш тамамланнганды.  

РФ-ни Правительствосуну буйругъуна тийишлиликде, Къабарты-Малкъаргъа тапландырыу ишлеге  219,3 миллион сом берилгенди, дагъыда 2,2 миллион сомну республика  къошханды. Анга «Нарт» микрорайонда  суу, газ эм ток   ызла тартыллыкъдыла. Ишлени бардырыргъа  аукцион бла  «ТРАНС СТРОЙ» эм   «ЭЛИТ-СТРОЙ» биригиуле сайланнгандыла. Сагъынылгъан жумушлагъа саулай да 230 миллионнга жууукъ къоратыллыкъды. Ишлени быйылны ахырына бошаргъа белгиленеди.