Пандемия малчылыкъ бёлюмню чырмамайды

Кёп болмай Россейни Эл мюлк министерствосуну малчылыкъ эм къумалылыкъ  жаны бла департаментини таматасы   Дмитрий Бутусовну  башчылыгъы бла  видеонконференция бардырылгъанды. Анда баш тема  пандемияны кезиуюнде малчылыкъ бёлюмде къармашхан предприятияла  болумгъа жораланнганды.  Тюбешиуге КъМР-ни эл мюлк министри Хасан Сижажев да къатышханды, деп  билдириледи ведомствону   пресс-службасындан.   

Хасан Сижажев айтханнга кёре, агропромышленный комплексде уруннган  малчылыкъ бла байламлы объектле эм жарашдырыучу предприятияла бир тюрлю чырмаусуз  алгъынча ишлейдиле.  Ол санда Роспотребнадзорну эсгертиулерине тийишлиликде  предприятиялада коронавирус жукъгъан ауруу жайылмазча санитар  мадарла сакъланадыла.   

- Бюгюнлюкде къыйын эпидемиология болумгъа да къарамай, малчылыкъ бёлюмде производство ахшы кёрюмдюле болдурады. Алай бла быйыл тогъуз айгъа чыгъарылгъан эсеплеге кёре, 371 минг тонна сют сауулгъанды, ол былтыр бу заман бла тенглешдиргенде 4,7 процентге кёпдю. Тууар эм юй къанатлыланы  этинден да   75,4 минг тонна неда 3 процентге аслам  сатылгъанды. Жумуртхаладан да  тогъуз айгъа   159 миллиону чыгъарылгъанды, анга кёре   2,5 процент ёсюм эсленеди, деп билдиргенди министр.  

Саулай алып айтханда, былтыр тууарланы санына уллу къошулмагъанды, къойла бла эчкиле уа азайгъан окъуна этгендиле.

Кенгешде   малчылыкъ бла кюрешген белгили эм жарашдырыучу предприятияланы келечилери да сёлешгендиле. Ала ишлерини юсюнден айта, коронавирус жайылмазча этилген  амалланы  ачыкълагъандыла.