«Адамны ариулугъун аны бирсилеге ушамагъан энчилигинде кёреме»

Нёгерланы Русланны жашы Алим бюгюнлюкде Москвада ишлейди. Ол косметологду эмда дерматовенерологду. Адан сора да, «Эксперт» деген илму-саулукъландырыучу араны консультантыды. Инъекцияланы эмда аппаратланы хайырланнган методикала жаны бла сертификаты болгъан специалистди.

Халкъла аралы симпозиумлагъа, семинарлагъа дайым да къатышханлай турады. Эстетикалы медицинадан илму ишле жазады, кесини профессионал усталыгъын тохтамай ёсдюреди.

Таулу жашны къыралыбызны ара шахарында кёпде таныйдыла. Аны билимине ышанып, оюмуна тынгыларгъа неда болушлукъ излеп да келедиле. Биз а аны бла ишини эмда башха затланы юслеринден ушакъ этгенбиз. -Алим, тёрели соруу боллукъ болур, косметологну жолу меникиди деген сезимге къалай бла келгенсе?

-Кертисин айтсам, сабийлигимден да врач болургъа сюйгенме. Илляуларым шприцле, системала, дарманла болгъандыла. Бир жумушакъ къоянчыгъым бар эди да, анга уколла этип бездирген эдим (кюледи).

Къашхатау элде ёсгенме. Школну тауусханымдан сора Саратовдагъы Василий Разумовский атлы къырал медицина университетге окъургъа киргенме. Эм алгъа нейрохирург  болургъа излегенме.  Биринчи курсдан сора  нейрохирургияда хирурглагъа  ассистентлик да этгенме.

Алай эсе да, кертисин айтайым, бир-бир врачланы саусузлагъа асыры жандауурлу болмагъанларын кёре, медицинаны  бу ызына сюймеклигим  къалай эсе да суууп къалады.

Артда реаниматолог-анестезиолог неда сабий хирург болургъа да сагъыш этгенме, сайлау бар эди да. Косметологиягъа уа бешинчи курсда келгенме. Кесими кечиндирир ючюн иш излеп, Саратовда,  ызы бла Москвада да ол жаны бла курсланы ётеме. Кертиди, алыкъа студент адамгъа бу жумуш  бла кюреширге тийишли да тюйюл эди.

Алай эсе да, ботокс бла  шприцни биринчи кере къолумда бешинчи курсда болгъанымда тутханма. Кеслерини сыфатларына ыразы болгъан, кёзлеринде къууанч сезилген пациентлени кёре уа, бу сайлауум мени алдамазлыгъын да ангылагъанма. Мен аланы бетлерин тюрлендирмейме, жаланда жашауларыны качествосу игиленирча болушлукъ этеме. Саратовда университетни тауусханымдан сора уа Москвада РУДН-ни дерматовенерология эмда косметология ызында билим алгъанма .

-Бюгюнлюкде Интернетде тюрлю-тюрлю, информация топпа-толуду. Адамлда неге ийнансынла?

-Врачны къалай сайларгъа керекди? Эм алгъа анга консультациягъа барыргъа тийишлиди. Аны бла бетден  бетге тюбеп, ушакъ этерге да керекди.

Билемисиз, пациентни да, докторну да ариулукъну юсюнден сагъышлары ангылаулары бирча болургъа, бетни эстетикасын да бир кибик кёрюрге тийишлидиле. Хау, адам кесине врачны сайларгъа эркинди. Алай эсе да, оюмласа тюздю.

Биринчи  жерде, айхай да, докторну билимлилигиди, окъуулулугъуду. Аны бла бирге уа аны кесини да сыфаты кёзню къууандырыргъа керекди.

Бюгюнлюкде косметология бла врачла-дерматовенерологла, пластика хирургла эркиндиле кюреширге. Ала бу жаны бла биринчи специализацияны 4-5 айны ичинде ётедиле. Болсада доктор тохтаусуз кесини усталыгъын ёсдюргенлей турургъа  борчлуду. Нек дегенде ол неда бу препаратны хайырланыргъа, аны  бла ишлерге жаланда башха-башха сертификатлагъа тийишли болгъанлагъа жарайды. Аланы уа тюрлю-тюрлю курсланы бардыргъан компанияла бередиле.

-Бусагъатда ариулукъну индустриясы болмагъанча айныйды.  Аны хайыры неда хатасы, ол жаны бла къалайды оюмунг?

-Кертиди, бу индустрия кечеден тангнга окъуна тюрленеди дерчады. Бир - бирле онсегиз жыллары толгъунчу окъуна  косметологга ботокс этдирирге «чапханлай» келедиле  неда эринлерин уллуракъ этерге, кёпдюрюрге сюедиле.

Жаш адамла биринчи инъекцияны этдирирге келгенлерини хатасы недеди десегиз, ол эм алгъа аланы не бла кюреширге билмей, безирегенлериндеди. Нек дегенде хар нелери да тапды сыфатларында.

Пациентле моданы ызларгъа талпынып, телевизорда модельледе, жулдузладамы дейик, кёргенлерин къатларгъа да къызынадыла. Алай бла кеслерини  сыфатларын бузуп къоярбыз деп да къоркъмайдыла.

Эстетика медицинагъа эртте келген пациент профилактика жанына къайгъыргъанын а тюз кёреме. Нек дегенде бетни  терисини къартайыуу  жыйырма беш жылдан башланады. Аны себепли ала бла артда ишлеген да тынч болады.

Моданы ызындан къууама деп, адамгъа кесилигин, энчилигин тас этип къояргъа да жарамайды. Ол ышан бек магъаналыды. Аны врач анга айтып ангылатыргъа да, пациент бла кеси ишлей туруп да аны сыфатын бузмай, сакълап къалыргъа да борчлуду.

-Кимле келедиле косметологга?

-Биз терини качествосун тапландыргъандан, аны жыйырылгъанларын сыйдамлагъандан сора да, ауруулагъа багъабыз. Ол кертиси бла да проблемады.

Пациент аны акне неда розацеа тюрлюлеринден къыйналыргъа боллукъду. Жарсыугъа, ала бек гитчечикледе, абаданлада да тюбейдиле. Бу тери ауруула адамда саулай жашаууну узунлугъуна къалып къалыргъа да боладыла.

Аны себепли бизге жаланда эстетика угъай, саулукъландырыу, багъыу  жаны бла да болушлукъ излеп келедиле. Косметология-ол, биринчиден, профилактикалы медицинады.

-Косметологча, кесинг а ариулукъгъа нени санайса?

-Эстетика медицинаны врачы болгъан къадарымда, адамны ариулугъун аны эринлеринде, гитче бурунчугъунда, ишленнген сакъалында угъай, аны бирсилеге ушамагъан энчилигинде кёреме. Аны бла бирге уа ол кесине къарай билирге да керекди деп сунама.

Мен  терини тапландырыу бла ишлерге сюеме, хау, ол кертиди. Нек дегенде оюмум алайды-саулукълу, качестволу терилери болгъан инсанланы жашаулары да анга кёре жетишимли болады.

Андан сора да, кёпдюрюлген эринледен эсе, не жаны бла да ариу къаралгъан, таза, сыйдам да тери кёзге хычыуун кёрюнюрюкдю. Табийгъат кеси адамны сыфатын тап жаратхан эсе, аны бла кёп кюреширге керекмейди. Жаланда пациентни  бетинде аны эриши кёргюзтген,  бузгъан заты бар эсе, ол заманда косметологдан болушлукъ излесе болады.

-Бюгюнлюкде Москвада ишлейсе.Мындан ары муратларынг а къалайдыла?

-Кертисин айтханда, амалым болса, тыш къыралда ишлеп, башхача сынам жыйышдырыргъа да угъай дерик тюйюлме.

-Биз билгенликден, алгъаракъда «Ногеров-Клиник» деген ат бла эстетика косметологияны арасын ачханса. Аны кесинги жетишиминге санаймыса?

-Профессионал, къалай дейим, чыгъармачылыкъ жолумда да манга болушхан болмагъанды. Мен болушлукъну сакълагъан да этмегенме. Адам жетишимге кесини билими, къыйыны бла келирге керекди деген жорукъгъа кёре жашайма эмда ишлейме.

Бюгюнлюкде Москвада фатарым, машинам, клиникам бар эселе, ол ёз къыйынымды. Огъарыда айтханма, таулу элде туугъанма, ёсгенме. Юйюрде бизни иш юсюнде чыныгъыргъа, окъуулу болургъа да юйретгендиле.

Косметологну жолун сайлагъанымда, кёпле анча жыл окъуп, жаланда баш врач-дерматологму боллукъса деп, жашыра да турмай, айтхан эдиле. Мени къадарыма ийнандыргъан, ышандыргъан а анам Марина  болгъанды. аны ышаныулугъун алдамаз ючюн а къолумдан келгенни  этгенме, билим алгъанма, усталыгъымы ёсдюргенме.

Косметология, бирле суннганча, алай тынч да тюйюлдю. Бу сферада сен дайым да кесинги квалификациянгы кётюргенлей, жангычылыкълагъа тюшюннгенлей, башха амаллагъа юйреннгенлей, адамны  анатомиясын да билгенлей турургъа борчлуса.

Жашырмай  айтханда, ол затланы барысына да тюшюннгенлей, битеу да тюрлениуледен, жангы затладан хапарлы болгъанлай  туруп, ол неда бу препарат бла ишлерге эркинлик алыр ючюн да кёп заман, ырысхы да къоратама. Кесим юйреннгенден сора да, аслам уллу компания бла байламлыкъ жюрютеме. Алада, сынамыма бирсилени да тюшюндюре, лекцияла окъуйма.

-Алим, бош заманынг а кълыучумуду?

-Ол менде бек азды. Аны асламысын  тутхан ишим алады. Не аз да бошуракъ болсам, китап окъургъа неда шахардан тышына кетип солургъа сюйюучюме.

Алай эсе да, солуп турургъа амал да чыкъмайды. Вебин

арла, семинарла, тренингле, мастер-классла да бардырама. Ала бла бирси шахарланы клиникаларына да чакъырадыла. Аны себепли хар неге да заман таплыгъы бла жетерча, аны юлеширге да тюшеди.