Агропромышленный комплексге болушлукъ юч кереге ёсерикди

Къабарты-Малкъарны Эл мюлк министерствосу «Халкъла аралы кооперация эм экспорт» миллет проектни чегинде  «Агропромышленный комплексни  продукциясыны  экспорту» программагъа  кёре эл мюлк жерледе мелиорация ишлеге субсидияла  берирча документлени алып башлагъанды. Аны юсюнден ведомствону сайтында билдиредиле.

Тийишли ишлеге республика быйыл 349 миллион сом бёллюкдю. Андан 345,5 миллион сом федерал эм 3,5 миллион сом республикалы  бюджетледен берилликди. Алай бла быйыл къырал болушлукъ былтырдан эсе юч кереге кёп боллукъду.

- Былтыр «АПК продукцияны экспорту» проектге  кёре мелиорация ишлеге 112,5 миллион сом берилгенди. Аны хайырындан 1,6 минг гектарда жауун халда суу чачдыргъан    машинала хайырланадыла.  Быйыл къырал болушлукъну ёсгени бла аллай жерле 4 минг гектаргъа жетдирилликдиле,- дейди КъМР-ни эл мюлк министри Хасан Сижажев.

Жорукълагъа кёре, субсидия энчи иелиледен бла  ёнкючлени хайырланнган  кооперативледен  къалгъан эл мюлк  предприятиялагъа  бериледи. Ол асламысында     гидромелиоратив ишле бла байламлы  къоранчланы бир кесегин жабаргъа хайырланады. Болсада  ол  аны багъасыны  жетмиш процентинден кёп болмазгъа керекди. Аны бла бирге суу сугъаргъан  машиналаны  сатып алгъанда неда аны жангыртханда,  бир гектаргъа  87,270 сомдан артыкъ субсидия къоратылмазча чек салынады.    
Болушлукъ алыргъа излегенле документлени кёп функциялы арагъа келтирирге  неда   «Почта России» бла жиберирге тийишлидиле. Ахчаны ётдюрюрден алгъа  комиссия  алагъа тынгылы къарарыкъды, ол санда   производство эм эл мюлк жерле бла да байламлы жорукъла  бузулмазча.