Музыканы дуниясына жол ачады

      Нальчикде  27-чи номерли  сабий садха жюрюген сабийлеге  музыкадан дерсле ыйыкъгъа эки кере бардырыладыла. Балачыкъла аланы артыкъда бек жаратадыла, алагъа сюйюп жюрюйдюле. Ала тюрлю-тюрлю конкурслагъа да тири къатышадыла. Аланы республикалы телевиденияны  гитчелеге деп къуралгъан бериулерине, ол санда "Биллячагъа", терк-терк чакъырадыла. Анда уа  ишин сюйген, аны билген, анга жюреги бла берилген устазны -  Башийланы Фатиматны – къыйыны уллуду.
    - Сабийлеге  малкъар тилде жазылгъан жырла жокъну орунундадыла. Аны себепли мен  поэтлерибизни назмуларын айырып, алагъа макъам къурашдырама,- дейди Фатимат.
   Ол, къобуздан сора да, фортепианону да  уста согъады. Гитчелени эстетикагъа, музыкагъа, тепсеуге  фахмуларын ачыкълаугъа энчи эс бурады.  
    - Музыкагъа юйретиуде аны кесини энчи амалы барды,-дейди сабий садны таматасы Юлия Кунашева. - Бери ишлерге да аны мен кесим чакъыргъанма, фахмулу адамды, сокъуранмайма. Ол  бир амалны къатлап тургъанладан тюйюлдю, къуруда излеудеди.