Бызынгыгъа баргъан жолну жангыртыу тохтаусуз барады

Бабугентден Бызынгы таба баргъан жолда жангыртыу ишле андан ары барадыла. Къабарты-Малкъарны жол мюлк Управлениясындан билдиргенлерине кёре, бу кюнледе подряд организацияны келечилери аны 4-12 километрлик кесегинде эски бурууланы кетериу бла кюрешедиле. Бирсилери жолну мурдорун хазырлайдыла, кёпюрню тёгерегинде темир-бетондан хунала сюейдиле эмда бир-бир жерлени ташладан толу аула тизип кючлендиредиле.

Республиканы Транспорт эмда жол мюлк министерствосуну бла заказчикни къурулуш контроль бёлюмюню келечилери ол тийреледе не мадар этилгенине дайым кёз-къулакъ болуп турадыла, деп ышандыргъандыла Управленияда. Ол санда къурулуш материалланы качествосуна, къаллай технологияла хайырланылгъанына, ишлени болжалына да. Белгилисича, аланы толусунлай быйылны ахырына дери тамам этип бошаргъа деп умут алайды.