Окъутууну бла юйретиуню амалларын игилендирир муратда

Бу кюнледе КъМР-де устазланы тёрели август жыйылыулары бардырылгъанды. Быйыл ол «КъМР-ни билим бериуню айнытыуну баш магъаналы борчлары: миллет муратладан регион эсеплеге дери» деген темагъа аталгъанды. Аны КъМР-ни Жарыкъландырыу эм илму министерствосу къурагъанды.

Россейни «Билим» биригиуюню регион къаууму форумну ишине тири къатышханды. Пленар жыйылыуда доклад бла «Билим» биригиуню регион бёлюмюню таматасы Алина Пшемурзова сёлешгенди. Ол окъуу юйледе юйретиуню тынгылы къураугъа себеплик этген шёндюгю жарыкъландырыу амалла бла шагъырей этгенди. Дагъыда жыйылыуну пленар кесегинде Жаш къараучуланы театрыны таматасы, «Билим» биригиуню лектору Алим Мамсиров спикерча къатышханды. Ол «Школ театрны юйретиу онглары» деген темагъа доклад этгенди.

Секциялада ишни магъаналы энчилиги – лекцияланы профильли эксперт майданланы модераторлары бла спикерлери бардыргъанларыды. Окъуу юйлени таматаларыны юйретиу жаны бла орунбасарларына эм таматаланы юйретиу жаны бла кенгешчилерине энчи секцияны КъМКъУ-ну Карьераны айнытыуну арасыны таматасы, «Билим» биригиуню лектору Кристина Лопатина бардыргъанды.

Алина Ашхотова бла бирге спикерле «Билим» биригиуню хакъсыз жарыкъландырыу мадарларын республиканы школларыны бла колледжлерини билим бериу программаларына сингдириу онгларына тынгылы къарагъандыла. Андан сора да, жетишимли регион сынауланы да кёргюзтгендиле. Сюзюуню энчи бёлюмю къыралны баш жарыкъландырыу саугъасы – «Билим.Саугъа» болгъанды. Экспертле ары къошулурча устазланы бла билим берген организацияланы башчыларына къаллай жорукълагъа энчи эс бёлюрге кереклисин ангылатхандыла.

Лекторланы эслерин форумну баш майданларында модерациялыкъгъа бла спикерликге буруу экспертизаны бийик даражада бардырыуну жалчытыргъа эмда жарыкъландырыуну федерал башламчылыкъларыны регион окъуу болумгъа хайырлы кийирирге онг бергенди. Кенгешни эсебине кёре «Билим» биригиуню келечилери бла республиканы устазлары жангы окъуу жылда байламлыкъда ишлер ниетлерин къатлагъандыла, деп айтылады «Билим» биригиуню билдириуюнде.