Кёп халкъланы битеулю жигитликлери келтиргенди хорламгъа

Бу кюнледе Пятигорск шахарда Росмолодежь. Форумла платформаны «Машук» XVII Битеуроссей жаш тёлю форумну биринчи сменасына къатышханла бла Москваны Михаил Ломоносов атлы къырал университетини политология факультетини россейли политиканы кафедрасыны доценти Сергей Белов тюбешгенди. Ол СССР-ни тюрлю-тюрлю республикаларыны келечилерини жигитликлерин эмда фронт бла тылны бирлигин эсде тутуу бюгюнлюкде алай магъаналы нек болгъаныны юсюнден айтханды.

Лектор Уллу Ата журт урушну жылларында совет аскерге 151 миллетден 34 миллиондан аслам адам чакъырылгъанын, 11 600-ден аслам аскерчи уа Совет Союзну Жигитлери болгъанларын эсгертгенди. Хорлам къыралны кёп миллетли халкъыны кючю бла болдурулгъанын чертгенди эм хар союз республика бла байламлы шартла келтиргенди. Машукчула Азербайджанны баш отлукъ бериучю магъанасын, Армениядан таурухлу 89 стрелковый дивизияны, кюйдюрюлген Хатыньде этилген зарауатлыкъны эмда Белоруссияда партизан къозгъалыуну кючюню юсюнден билгендиле.

Тюбешиуде адамланы юслеринден хапарлагъа энчи  эс бурулгъанды. Дагъыда Брест къаланы къоруулагъанланы жигитликлери, аланы ичинде кёп миллетни келечилери сермешгенлери, Совет Союзну Жигити Мехти Гусейн задени батырлыгъы эмда уруш жыллада миллион бла жарымдан аслам адамны кеслерине алгъан узбек халкъы, ала бла бирге СССР-ни Илму академиясы бла сабий эвакопунктла да эсгертилгендиле.

—  Ол кезиуде этилген жигитлик битеулю болгъанын, хорламгъа кёп халкъла къыйын салгъанларын окъуучулагъа билдирирге керекди, — деп белгилегенди тарыхчы.

Сюзюу шартла бла чекленип къалмагъанды. Бюгюнлюкде билим бериу арада тарых эсни къалай сакъларгъа боллугъуну юсюнден соруу жаш устазланы бек къайгъы этдиреди. Ала «Эсни къабыргъасы» дегенча проектлени Россейни битеу регионларында бардырыргъа керекмиди, деп соргъандыла.

—  Мен, не болса да, ол жанлыма. Андан да бег а, хайырланыр амалла тюрлю-тюрлю болсала сюеме. Сёз ючюн, аладан бири аскер видеооюнла болсунла, ала, айхай да, тюзетиу халлы болсала. Жаш тёлюню аллай затлагъа ала ангылагъан амалла бла къошаргъа керекди, - деп,  Сергей Белов  патриот ниетде юйретиуню шёндюгю амалларын сюзерге чыгъаргъанды.

Атлары тарыхда къалгъан инсанланы юслеринден соруулагъа да эс бёлюнмей къалмагъанды. Тюбешиуге къатышханланы разведчик Рудольф Рёсслерни къадары эм белгили лётчик Александр Покрышкинни уруш жолу сейирсиндиргендиле. Ахырында спикер сюзюлген тема чексиз болгъанын, лекцияны заманы уа хар нени да ачыкъларгъа онг бермегенин айтханды.

— Биз Совет Союзну битеу республикаларыны юслеринден сёлешгенбиз, алай а мен битеу жигитлени сагъыныргъа жетишалмагъанма. Келир заманда сизни бла тюбешип, военкорланы юслеринден айтыргъа сюеме, — деп чертгенди эксперт.

«Машук» битеуроссей жаш тёлю форумну къурагъанла Жаш тёлюню ишлери жаны бла федерал агентстводу, Ставрополь крайны Правительствосуду. Баш партнёру - «Машук» билим арады.