Жоллада сакълыкъ - хар кимни да борчуду

КъМР-де МВД-ны Къырал автоинспекциясыны ишчилери, МВД-ны Урван районда акъылбалыкъ болмагъанланы ишлери жаны бла (ПДН) бёлюмюню инспекторлары бла бирге Нарткъала шахарны сабий майданчыкъларында эмда скверлеринде ангылатыу жумуш тындыргъандыла, дегендиле КъМР-де МВД-ны пресс-службасында.

Заманларын зауукълу ётдюрген гитче къауумгъа полициячыла жоллада орналгъан белгилени эмда светофорланы юслеринден хапарлагъандыла, орамны бирси жанына къоркъуусузлу ётер амалла бла шагъырейлендиргендиле, электрокюч бла ишлеген (минип барыучу) затланы аберилеге урулмай къалай жюрютюрге кереклисин да билдиргендиле. Сабийлеге къаты айтылгъанды: ойнаргъа сюйген жолдан узакъда болсун!

Жоллада сабийле да къатышып осал болумланы сылтауларыны асламысы быладыла: жолну бирси жанына терс жерде ётюу, бара тургъан неда сюелген улоуну артындан чабып чыгъыу, светофорну излемлерин сансыз этиу.

Полициячыладан дагъыда бир эсгертиу: ингирде неда кече тышына чыкъгъанда, адамны къолларында неда юс кийимлеринде чыракъ жарыкъны ызына къайтаргъан абериле болсала игиди. Анга къуру сабийле угъай, таматала да эс бурургъа керекдиле. Нек дегенде, ол затланы хайырындан водительле аланы узакъдан окъуна кёредиле.