Футболну – мектеплеге

Футболдан россейли биригиу «Мектепде - футбол» деген башламчылыгъын быйыл кезиулю алтынчы кере бардырады, деп билдиредиле республикабызны Спорт министерствосундан.

Къыралда бу проектге жети минг школ къошуллукъдула, башхача айтханда, хар жетинчи мектеп. Жангы окъуу жылдан а футболгъа школгъа дери юйретиуню программасы да кенгертилип, 61 регионда 950 сабий садда жарауланы ётдюрюп тебирерикдиле. Былтыр ол мадар 288 сабий садда  этилгенди, жараулагъа 37,4 минг сабий жюрюгенди. Хар садха топла, футболну белгилери бла саугъала, башха керекле да берилликдиле.

«Мектепде - футбол» къыралыбызда эм уллу сабий спорт башламчылыкъладан бириди, аны хайыры бла физкультурадан дерследе сюйген спортлары бла 2,5 миллион окъуучу кюрешеди. Эсеплеге кёре уа, аланы 10 проценти артда секциялагъа да жюрюп башлайдыла. Бу башламчылыкъны дагъыда бир энчилиги - аны чегинде эришиуле да къураладыла. Алагъа муниципал кезиулеринден ахыр матчларына дери 500 минг чакълы сабий къатышханды. Быйыл эки жыл сан къауумда – 13 жылгъа эмда 15 жылгъа дери – эришиуле ётдюрюллюкдюле, кичилени финал тюбешиулери – «Лужники» стадионда, абаданланы уа Анапада боллукъдула.   

Проект устазлагъа да хайырлыды. Аланы даражаларын ёсдюрюр, мектепледе бу жаны бла дерслени бютюн сейир ётдюрюр мурат бла «Футбол кесине тартады» деген сынау къуралады, аны саугъа хазнасы уа 13 миллион сомгъа жетеди. Тёрт жылны ичинде анда къыралыбыздан мингден аслам устаз хорлагъандыла, алагъа 35–150-мингишер сом тёленнгенди. 

Проектни Россейни Спорт эм Жарыкъландырыу министерстволары тамамлайдыла.