Жолда къоркъуусузлукъну унутмазларын эсгергендиле

Кёп болмай «Жаш пешеход» оператив-профилактика ишни чеклеринде Россейни МВД-ны Чегем районда акъылбалыкъ болмагъанланы ишлери жаны бла бёлюмюню келечилери   школчула бла тюбешгендиле, деп билдириледи КъМР-де МВД-ны пресс-службасындан.

Быллай акцияны магъанасы жолда жаяу жюреген сабийле ачымазча, аны бла байламлы жорукъланы билирча, уллу кёллюлюк этмей сакъ болурча эм  жамауатны жанындан да  анга аслам эс бурурча этергеди.  

Аны кезиуюнде полициячыла  сабийлеге жолда кюн сайын хайырланылгъан  жорукъланы эслерине салгъандыла, ол санда «зебралада» эм башха жерледе да эки жанына да  тыныгылы къарап, ашыкъмай алай ётерге кереклисин жерине салгъандыла. Кече жюрюгенде да,  юс эм аякъ кийимлеринде жылтырауукъла болсала, водительле заманында эслерча ахшы себеплик этеригин да билдиргендиле. Бютюнда ол къыйын хауа болумну кезиуюнде иги болушханын чертгендиле.   Жаш велосипедистлеге да жолдан тийишли жерде ётерге унутмазларын  эм жорукълагъа кёре жаяу ётерге тийишлиликлерин айтхандыла. 

Ахырында ич ишлени келечилери жолда баргъанда дайым къоркъуусузлукъну унутмазгъа, кеслерине эм нёгерлерине да сакъ болургъа, транспортха чырмау салмай  кеслерин низамлы жюрютюрге кереклерин эслерине салгъандыла.