Жолла мардалагъа келиширча

Къабарты-Малкъарда  "Жашау этерге инфраструктура"  миллет проектге кёре аслам иш бардырылады. Аны чеклеринде Урван бла Прохладна районланы бирге къошхан   узунулугъу 12,5 километрге жетген Черная Речка — Благовещенка жолгъа да тынгылы ремонт этиледи, деп билдиргендиле  КъМР-ни Транспорт эмда жол мюлк министерствосундан.

Кёп болмай ишчи жолоучулукъларыны чеклеринде  Битеуроссей халкъ фронтну КъМР-де бёлюмюню келечилери Жол управленияны специялистлери бла бирге объектде болуп ишле къалай баргъанларына къарагъандыла.

Бюгюнлюкде подряд организацияны келечилери,  жолну мурдорун кючлеп бошап, асфальт жайып башлагъандыла. Ызы бла къоркъуусузлукъну жалчытырча абериле да жарашдырыллыкъдыла. Ол санда темир буруула тартыллыкъдыла,     жорукъланы билдирген белгиле бла ызла да  салынырыкъдыла. 

- Таш жолну  жангыртылырын, мардалагъа келиширча этилирин былайдан кюн сайын  жюрюген урванчыла бла прохладначыла   эрттеден сакълагъандыла. Биз жамауатны атындан ишле болжалдан кеч къалмай тамамланырларына, жангы технологияла бла тынгылы материалла хайырланырына эм  жамауатны оюмуна  эс бурулуруна къарайбыз. Саулай алып айтханда, ишле графикден кеч къалмай этиледиле, болсада объект  битгинчи  бери терк-терк келип, болумуна  эс бургъанлай турлукъбуз,-  дейди ОНФ-ну келечиси Анзор Карданов.      

Эсге сала айтсакъ,  тынгылы ремонт баргъан объектледе ишлени  тынгылылыгъына ведомствону келечилери бла  бирге жамауатчыла да дайым эс бургъанлай  турадыла.  Ол  ишле ачыкъ бардырылгъанларына шагъат болады. Бир тюрлю кемчилик тинтилсе, созмай кетерирлерин айтдыла. Хайырланыргъа хазыр   жолла да комиссия мониторинг бардырмай ачылмайдыла.