Бешинчи кере да - биринчи

Кёп болмай Москвада гитче шахарланы бла эрттегили эллени айнытыу форумда иги шахар болум къурау жаны бла XI битеуроссей конкурсну эсеплери чыгъарылгъандыла. Аны пленар сессиясына РФ-ни Правительствосуну Председатели Михаил Мишустин да къатышханды.

Бу жол Чегем районну "Черек таулагъа тюбеген жерде" деген проекти хорлап, 96,7 миллион сом къоллу болгъанды. Ол ахча жууукъ заманда районда  жерлешлерибиз сайлагъан жамауат жерлени игилендириуге къоратыллыкъды. Аладан бири Чегем шахарда Чегем сууну боюнунда орналгъан "Штауч" стадионду.

Проектде белгиленнгенича, алгъадан ишленнген жамауат жерлени бирикдирирча мадар этилликди, ол санда адамла солурча жер, спорт бла кюреширча  майданла эм башха объектле да къураллыкъдыла. 

Эсге сала айтсакъ, Чегем федерал даражалы конкурсда бешинчи кере хорлайды. Бу жол аны бла бирге  Басхан бла Прохладный шахарланы проектлери да айырмалы болгъандыла. Аны хайыры бла шахарланы бютюн айбат этерге, адамланы жашау болумларын игилендирирге онг табыллыкъды.

КъМР-ни Башчысы Казбек Коковха конкурсну бар кезиуюнде да къайгъыргъаны эм билеклик этгени ючюн Чегем районну администрациясы ыразылыгъын билдиреди.