«Жюрекден жюрекге» - сабийлени муратларын толтура.

Бу кюнледе Нальчикни «Жашил театрында» Азамат Цавкиловну XII тёрели «Жюрекден жюрекге» жандауурлукъ концерти ётгенди. Байрамны КъМР-ни Жаш тёлюню ишлери жаны бла министерствосу, КъМР-ни Маданият министерствосу эм «КъМР-де волонтёрлукъну (доброволецлени) айнытыу жаны бла ресурс ара» АНО къурагъандыла.

Хар келгеннге волонтёрла мороженныйле бере эдиле.

Бу концерт бла бирге жангы окъуу жылны аллында «КъМР-де волонтёрлукъну (доброволецлени) айнытыу жаны бла ресурс ара» АНО, КъМР-ни Жаш тёлюню ишлери жаны бла министерствосу, КъМР-ни Саулукъ сакълау министерствосу, КъМР-ни Жарыкъландырыу эмда илму министерствосу, КъМР-ни Урунуу эмда социал къоруулау министерствосуну болушлугъу бла 2022 жылдан бери «Сабийни школгъа хазырла» деген жандауурлукъ марафон жыл сайын бардырылады. Аны чеклеринде къыйын жашау болумгъа тюшген сабийлеге ахча жыйылады, анга школ керекле да алынырыкъдыла. Анга ким сюйсе да къатышаллыкъды, гитче къошумчулукъ окъуна уллу магъананы тутады. Тёредеча, марафон августда Азамат Цавкиловну «Жюрекден жюрекге» деген жандауурлукъ концерти бла бошалады.

Концертни Мызыланы Аубекир бла Марина Лукожева бардыргъандыла.

«Кёп жыл мындан алгъа Азаматны 20 августда жандауурлукъ концертни къураргъа сыйлы оюму туугъанды. Бюгюн да Азамат барыбызны да мында онэкинчи кере жыйгъанды» - деген сёзле бла Марина Лукожева келгенлеге билдиргенди.

Концерт РФ-ни бла КъМР-ни гимнлеринден ачылгъанды.

Аны ызындан Азамат Цавкилов, келгенлени алгъышлап, «Сердце единое» деген жыр бла концерт программасын башлагъанды.

Ол кюн КъМР-ни сыйлы артисти Азамат Цавкиловха билеклик этгенле аны бла бирге сахнада ишлеген жырчы шуёхла да болгъандыла. Ала КъМР-ни къырал музыка театрыны солисткасы Марина Пачева, Евгений Енин, Нурлан Джамалдинов, Милана Вологирова, Бэлла Базоркина,  дагъыда «Арабеск», «Каллисто», «Насып», «Dance Masters» тепсеу ансамбльле да къатышхандыла.

Тынгылы концерт программа баргъан кезиуде волонтёрла да кеслерини ишлерин тынгылы бардыра эдиле. Сценаны эки жанындан да ахча жыйгъан урнала орналып эдиле. Анга къошакъ дагъыда сценаны бир жанында волонтёрла канцелярия кереклени жандауурлукъгъа жыя эдиле.

Дагъыда сахнагъа бу проектге кеслерини ыразылыкъларын билдирирге КъМР-ни жаш тёлюню ишлери жаны бла министри Азамат Люев бла КъМР-ни маданият министрини орунбасары Рита Таова чыгъып сёлешгендиле.

«Бу залгъа жюреклери халал, ачыкъ, чомарт болгъан адамла келгендиле. Азамат бу жандауурлукъ ишни кесини туугъан кюнюнде бошдан башламагъан сунама. Нек дегенде, аны халал жюреги кимге да болушургъа ачыкъды. Биз да кесибизден бу проектге билеклик этерге чакъырабыз», -дегенди келгенлеге Рита Таова.

Азамат Люев а КъМР-ни Президенти Казбек Коков бу проектге хар жыл сайын биринчилени санына кирип болушханыны юсюнден айтханды. «Казбек Валерьевич биринчи взносну кесинден хар жыл сайын береди. Мен Азамат бла университетде да бир заманда окъугъанма, ол себепден аны адамлыкъ шартлары бийикдедиле. Иш кёллю, жумушакъ жюрекли, чомарт инсанса. Сени ёсдюрген ата, анагъа да уллу ыспас этеме. Мындан  ары да чыгъармачылыкъ жолунг ачыкъ болсун», -дегенди ол.

Дагъыда «Бу жылда сизни болушлугъугъуз бла сабийлени муратларын толтураллыкъбыз. Жыл сайын сабийлени школгъа хазырлагъан кезиуде биз, 800 канцелярия кереклиледен комплект жыйып,  къарыусуз юйюрлеге болушлукъгъа беребиз. Бу ишде бизге сом бла, шай бла болушханнга окъуна ыразылыгъыбызны билдиребиз», - деп къошханды Азамат Люев.

Андан ары министр юлгюге Алим Иншоковну юсюнден айтханды, анга бу акцияда жыйылгъан ахчадан жангы компьютер алып, саугъагъа бергендиле. Аны бла Алимни эрттеден да кюсеп тургъан муратын толтургъандыла.

Ахырында Азамат Цавкилов «Жюрекден жюрекге» деген жырын тёредеча жырлап, концертни бошагъанды.