Гёжефлерибиз – алчыла

Бу кюнледе Нальчикде «Вымпел» спорт комплексде Россей Федерацияны миллет гвардиясыны аскерлерини тутушууну бирикдирилген тюрлюсюнден чемпионаты бардырылады. Эришиуле РФ-ни миллет гвардияны аскерлери къуралгъанлы 10 жыл толгъанына эмда право низамны сакълаучу аскерлени 215-жыллыгъына, Россейни халкъларыны бирлигини жылына да жораланнгандыла. Ары битеу къыралдан 70-ден аслам спортчу жыйылгъанды. Юч кюнню ичинде къаты сермешле бардырылгъандыла. 

Къууанчлы ачылыуну сыйлы къонакъларыны араларында КъМР-ни Экономика эмда жамауат къоркъуусузлукъну советини секретары Казбек Татуев, Россейни Тутушууну бирикдирилген тюрлюсюнден федерациясыны президенти Олег Уфимцев, регионну министерстволарыны бла ведомстволарыны келечилери, Къабарты-Малкъарны жамауат-патриот эмда ветеран организацияланы белгили спортчулары болгъандыла.

Турнирге Шимал-Кавказ, Къыбыла, Приволжский, Ара, Шимал-Кюнбатыш, Урал, Сибирь эм Кюнчыгъыш округланы жыйымдыкъ командалары келгендиле. Гёжефлени санында - спортну сыйлы усталары, халкъла аралы класслы устала эм Россейни спорт усталары да бардыла. Бир-бир аскерчиле уа, къууанчлы ачылыуда «Россейни спортуну устасы» деген атха тийишли болгъанларын билгендиле.

Эришиуле РФ-ни бла КъМР-ни гимнлери бла ачылгъанды. Аны ызындан къуллукъ эмда аскер борчларын толтура туруп жан бергенлеге шош туруп хурмет этерге чакъыргъандыла.  Росгвардияны Спорт комитетини председатели, полковник Павел Пак келгенлеге жетишимле тежегенди. Ол бу кюнледе бек иги аскерчилери бийик усталыкъларын эмда хорламгъа талпыныуларын кёргюзтюрюклерине ышаннганын билдиргенди.

Олег Уфимцев спортну бу тюрлюсю кёп миллетли болгъанын эм битеу къыралда терк белгили бола баргъанын чертгенди. Ол айтханнга кёре, бу эришиулеге къызла къошулургъа да эркиндиле, аны баш магъанасы уа – алгъан усталыкъларын аскерчиле къуллукъ борчларын толтурууда тюзюнлей хайырланыргъа боллукъдула.

Чемпионатны баш судьясы Борис Ошивалов тутушууну бирикдирилген тюрлюсю экиге бёлюннгенин ангылатханды. «Бу спортну жорукъларына кёре, биринчисине бир бирни уруп тюйюшюу киреди, экинчиде уа жаланда тутушха эркинлик бериледи.

Быллай эришиуле спортчудан чыдамлыкъны, къарыуну бла тынгылы хазырланыуну излейдиле. Дагъыда былайда белинден тёбен урургъа жарамайды, спортчула уа къоруулаучу жилетле, шлемле эм бокс къол къапла бла хайырланадыла», - дегенди ол. 

Андан сора концерт болгъанды. Аны Россейни Миллет гвардиясыны аскерлерини Жуков орденли Шимал-Кавказ округуну штабыны аскер оркестри ачханды. Ызы бла КъМР-ни сыйлы артисти Азамат Цавкилов, КъМР-ни къырал музыка театрыны солисткасы Марина Пачева, КъМР-ни бла Адыгея Республиканы сыйлы артисти Артур Дышеков бла Виктор Ким жырлагъандыла. «Шагди» халкъ ансамбль эм «Кабардинка» къырал академия ансамбльни солистлери уа тепсегенлери бла къараучуланы къууандыргъандыла. 

Ара округдан къошулгъан гёжеф эришгенлеге эм башы – турнирни жарасыз бошау болгъанын чертгенди. «Бизге, спортчулагъа эм аскерчилеге, ол уллу магъананы тутады. Жаралы болгъанда, сен сюйген ишинги эталлыкъ тюйюлсе, алай эсе, керти да насыплы боллалыкъ тюйюлсе. Аны ючюн биз бир бирибизни ачытмазгъа кюрешебиз», - дегенди спортчу.

Сермешле 8 ауурлукъ къауумда ётгендиле. Чемпионатны ючюнчю кюнюнде битеу къауум зачётда Шимал-Кавказ округну гёжефлери биринчи жерни алгъандыла. Экинчи жерге Ара округну жыйымдыкъ командасы тийишли болгъанды. Ючюнчюле уа - Къыбыла окргну спортчулары.

Хорлагъанла бла алчы жерлени алгъанла кубоклагъа, майдаллагъа эм «Победоносец» АНО-дан сыйлы саугъалагъа тийишли болгъандыла.

Чемпионатны Бир битеуроссей спорт классификацияны белгиленнген излемлерин толтурургъа спортчула «Россейни спортуну устасы» деген атха тийишли болургъа боллукъдула эмда Коллектив къоркъуусузлукъну юсюнден келишимнм биригиуюню Кубогуну халкъла аралы турнирине къошулур ючюн жыйымдыкъ къауумгъа къошуллукъдула. Эришиуле октябрьде бардырыллыкъдыла. Ары СНГ-ни, Вьетнамны, Монголияны эмда Конгону къауумлары да къошуллукъдула.