Къыйынына – бийик багъа

Шукаланы Борисни жашы Назирге бу кюнледе «За милосердие и помощь» деген майдал берилгенди. Аны бла бирге ол энчи аскер операциягъа къатышып къайтханланы  регион жамауат биригиуюню бюсюреу къагъытына, уллу ыспасына  да тийишли болгъанды.

Аллай сыйгъа Назир энчи аскер операцияны ветеранларына эмда бюгюнлюкде  Ата журтубузну жалынчакъсызлыгъы ючюн къазауат эте тургъанланы, аланы юйюрлерине да  дайым къайгъыргъанлай тургъаны ючюн тийишли кёрюлгенди.

Шукаланы Назир  жаякъ-бет бла байламлы аурууладан бакъгъан хирургду. Кюн сайын, саусузлагъа болуша, алагъа тамблагъы кюннге ышаныулукъ береди. Андан болушлукъ излеп келгенлени асламысы урушда ауур жарала алгъанладыла, бетлеринде къыяулары бла туугъанладыла, онкология ауруудан сора тапхан жаралары бла къыйналгъанладыла. Назир Борисович  алагъа багъыу бла чекленип къалмай, ариу сёзю бла да кёллендиреди, ала ийменмей ышарырча  этеди.

Шука улу тындыргъан башха  жумушлары уа аны ишчи усталыгъыны чеклеринден чыгъадыла. Ол энчи аскер операциягъа къатыша тургъан жашланы  юйюрлерине, сабийлерине да дайым болушханлай турады. Юйюр жашауларында тюбеген чырмауланы кетерирге себеплик этеди, алагъа да  сёзюн, къол, ёз къыйынын да къызгъанмайды, алай бла къолундан келгенича, къыйын сынауладан ётгенлени жашаугъа къайтарыргъа болушады.

Назир Борисович  къаллай махтаугъа, ыспасха да тийишлиди. Мындан ары да таулу жаш  тутхан ишинде жетишимли, жюрек халаллыгъы бла  этген огъурлу жумушлары уа  кёплеге юлгю болурла, деп ышанабыз. Ол тамамлагъан ишлери ючюн тийишли болгъан майдал а бек гитче саугъаларындан бири болсун, деп айтылады Черек районну администрациясыны пресс-службасыны билдириуюнде.