Заманларын хайырлы ётдюрюрча

КъМР-ни Къурулуш эмда жашау журт-коммунал мюлк министерствосундан билдиргенлерича, бу кюнледе Акъ-Сууда «Жашау этерча  инфраструктура» миллет проектге кирген «Иги шахар болум къурау» федерал программагъа кёре, сабийлеге заманларын зауукълу ётдюрюрча жамауат жер ишлене турады. Ол  киши хайырланмагъан жерде къураллыкъды. Мында сабийле ойнаучу жерледе  аберилерин ачытмазча резинден къалын кюйюз  жайллыкъды. Жаяу жолчукълагъа асфальт салынырыкъды. Майданлада сабийлени жыл санларына кёре   ойнаучу комплексле жарашдырылгъандыла. Жараула бардырыргъа, саулукъларын кючлерге  сюйгенлеге да ачыкъ кёкню тюбюнде аламат тренажёрла бла турникле бардыла.  

Бюгюнлюкде къурулушчула объектни тёгереги бла мал неда тыш адам  кирмезча  ау тартып бошай турадыла. 

Эсге сала айтсакъ, быллай проект  элде жашау бютюн иги жанына тюрленилирине   ахшы къошумчулукъ этеди.  Бусагъатда окъуна   мында солургъа эм  жараула бардырыргъа иги кесек адамны   келгени  анга   шагъатлыкъ этеди. Мындан арысында  аллай жамауат жерлени  санына къошула барлыгъы да баямды.