Байламлыкъланы кючлей

Къабарты-Малкъарны Спорт министерствосу «Созвездие добра» жандауурлукъ фонд бла бирге «Пять колец» спорт академияда республиканы спортда ветеранлары бла тюбешиу къурагъанды. Анга  спортну усталары, физкультураны бла спортну сыйлы къуллукъчулары, регионну бла къыралны атындан даражалы эришиуледе сермешген инсанла, гёжефлени жангы тёлюлерин хазырлагъан тренерле чакъырылгъандыла. Жаш атлетле уа алагъа сайлагъан спортларында усталыкъларын кёргюзтгендиле.
Быллай тюбешиуле тёрели халда бардырыладыла. Фондну къураучуларындан бири  Виталий Мнацаканов тёлюлени араларында байламлыкъла  уллу магъананы тутханларын белгилегенди. «Тамырларыбызны унутсакъ, тамблабыз жетишимли  хазна болсун. Ветеранларыбыз уллу сынам жыйгъан, фахмулу адамладыла, аладыла ёсе келген тёлюге ол байлыкъны ётдюраллыкъла. Бусагъатда тёрелени сакълауну магъанасыны юсюнден дайым айтылады, спортда да анга эс бурургъа керек болгъанына ишеклигим жокъду», - дегенди ол.
Ветеранлагъа саугъагъа спорт керекле сатхан тюкеннге сертификатла юлешиннгендиле, кёп ыразылыкъ сёзле айтылгъандыла. Андан тышында, фонд къыйын жашау болумгъа тюшген юч жаш спортчугъа да болушлукъ этгенди.