Жарауланы - чемпион бла бирге

Бу кюнледе Черек районнга тёрт кере Олимпиада оюнлада, кёп кере дуния эмда Европалы чемпионатлада хорлагъан Александр Попов  келгенди. Ол  жаш спортчула бла тюбешип,  мастер-классла бардырлыкъды.

Александр Поповха КъМР-ни Парламентини Председателини орунбасары   грек -рим тутушуудан Олимпианы чемпиону Мурат Карданов,  Черек районну администрациясыны башчысы Къулбайланы Алан тюбегендиле. Районну  «Къууанч» Маданият юйюню директору Таппасханланы Мухтар, «Къууанч» ансамбльде тепсеген къыз бла жаш да,  тау адетдеча,  гоппан айран эмда хычинле бла чыкъгъандыла белгили спортчуну аллына.            

Районда къонакъ  ыйыкъдан артыкъ заманны туруп, Къабарты-Малкъардан, Ставрополь, Краснодар крайладан Москвадан эмда Санкт-Петербургдан келген сууда жюзюу спорт бла кюрешген элли беш  жашны арасында  жараула эмда мастер-классла бардырлыкъды.

Жараулагъа къатышхан спортчулагъа дунияны башында сууда жюзюуню эм иги устасыны амалы бла шагъырейлениу эмда  профессионал усталыкъгъа юйрениуню аламат онгуду.

Спорт программадан сора да,   аламат культура программа да къуралгъанды. Жаш жюзюучюле Черек районну айбат жерлерин, Чирик кёлюн да кёрлюкдюле.  Алай бла спорт жарауларын да этип, зауукълу  солуп, миллет ашарыкъладан да татып, юйлерине къайтырыкъдыла, деп билдиргендиле Черек районну пресс-службасындан.