Керти байлыкъ – халаллыкъ

Бюгюннгю жашау къыйынды, татыусузду да дейбиз. Кёбюсюнде ачыуланыргъа да тюшеди. Алай адам улу къадаргъа ийнанмагъанча кёрюнеди. Кюн сайын Аллахутала бизге сагъыш этдирлик белгиле кёргюзте турады. Ариу жашап жюрегин, ниетин да таза туталгъан адамла бла, юлгю болсун дей, шагъырей этеди. Алай бизни уа, хоу бир да, кесибизни жангылычларыбыздан окъуна дерс чыгъарыр тёзюмюбюз, сабырлыгъыбыз къалмагъанды. Жашауумда аллай бир аламат юлгю дерсин дагъыда къайтып мен да алдым.

Эгечимден туугъан Ахматны, жюреги ачыкъдан болур, иги тенглерини арасында къабартылы жашла да бардыла. Иги дегенде, ариу къылыкълы, терен намыслы, уллугъа хурмет эте билгенле. Ата-ана юйюме Кенже элге бир баргъанымда, аш юйде тепси арты толу Ахматны нёгерлери сыйлана тура эдиле.

Манга уа жаш тёлю къачан да сейир, хычыуун болгъанды. Ол берекетни кёрюп, жюрегим къууанып, уялтмайым дей, арбазгъа чыкъгъан эдим. Ол кюнден сора ала бла хар юйге баргъанымдан тюбеше тургъанма. Къалай эсе да, манга кеслерин жууукъ адамларымча сюйдюралгъандыла. Юйде не жумуш болса да, сеники-меники дей турмай, биринчиле болуп табылгъандыла.

Алгъаракълада саулай да республиканы жамауаты бир ауругъан жашчыкъгъа дарман алыргъа болуша, къолларындан келгенича кюрешгенлерин барыбыз да эшите, кёре, кёплерибиз а болушхан да эте тургъанбыз. Аллах болушсун, бир сабий да аурумасын. Ахматны тенглеринден бири Ислам Далов да кесича анга болушургъа ниет этеди. Аны юсюнден айтырдан алгъа окъуучуланы Ислам бла танышдырайым.

Анга жаланда 22 жыл толгъанды. Ол динни жюрютген юйюрде туууп, таза жорукъланы, ариу юлгюлени кёре ёсгенди. Сюйдюмлю, ариу жашчыкъ болгъаны да 8 мартда туугъаны ючюндю деп, чам этиучю эдиле нёгерлери. Сабийлигинден окъуна сейири кёп затха бёлюннгенди. Ёсе келгенинде уа, спорт бла да кюрешгенди. Каратени бир тюрлюсюнде, спорт гимнастикада жарау эте, бир талай жылны эришиуледе жаланда алчы жерлеге тийишли бола келгенди.

Нальчикни 9-чу номерли орта школунда окъугъан кезиуюнде, мектепни жамауат жашаууна тири къатыша, байрамлада, КВН-де да сюйюп ойнагъанды. Тенглери бла татлы шуёхлукъ жюрюте билгени себепли аны барысы да бек багъалы кёргендиле. Эси игиден, эшитген затын унутмай, акъылын да сакълаялгъанды.

Тамата класслада окъуй тургъанында, аякъ машиналагъа жюреги тартып, алагъа ремонт этип, бир ненча бузулгъанындан жангысын жыя башлагъанына юйюрю да къууана эди.

Школну бошагъандан сора Гуманитар-техника колледжде юрист усталыкъны алады. Ол заманнга онсегиз жылы толгъаны себепли аскерге къуллукъ этерге къууанып атланады. Баям, патриот сезимини кючю чакъыра болур эди аны ары.

Анда къуллукъ этген жылыны ичинде юйюне махтау къагъытла бир ненча кере келгендиле. Тула шахарда Уллу Хорламгъа аталгъан парадда танкны сюргени бла бек ёхтемленнгенди. Аскер борчун жетишимли толтуруп къайтханындан сора бийик билим да алгъанды.

Сабий заманындан окъуна бир затдан къоркъмагъанды. Кимге болушлукъ керек болса, Ислам алайгъа биринчи болуп табылгъанды. Ким биледи, аны ючюн окъуна болур эди МЧС-ни от тюшюуге къажау службасында ишлеп башлагъаны да. Алай хар неге да жетиширге таукеллендирген жашлыкъ Исламны сезимин энчи иш къураргъа чакъыргъанды.

Алай бла ол кёпле сюйген тюрк амал бла юзмезде кофе биширген кафе ачады. Ол жумушну бек жаратып, бизнесин кенгертир мурат бла болушлукъчу къауум да къурап, тойлагъа, башха къурманлыкълагъа да чакъырыуланы къабыл кёре башлайдыла. Алайда сом-шай тюшюралгъанына къууана, кёлюн бютюнда ишине бергенди. Шимал Кавказны регионларына окъуна чыгъа тебирейдиле.

Башда сагъыннган хапарыбызгъа къайта, саусуз сабий Имран Канцалиевге болушууну ол баш борчуна салады. Аны ючюн видеоролик жаздырып, жамауатны кесине кофе ичерге чакъыра, 2-3 ыйыкъны ичинде андан тюшген файданы ол сабийге бераллыгъына къууаннгандан, арыгъаны окъуна кёзюне кёрюнмей ишлегенди. Ариу ниети, таза жюреги кюч бере болур эдиле. Келишиулюкню майданында бир ыйыкъны ишлейди. Ол файданы элтип, умут этгенича, болушлукъ керекли сабийни юйюрюне берип, алыкъа энтта келтирлигин айтып, къууанып къайтады.

Кёлю асыры кётюрюлгенден, адамларын тансыкълап, тенглерине сёлешип, аланы ийнакълап, ингирде юйюне келеди. Эрттен намазгъа турмагъанын эслеп, атасы Мурат, жашыны отоууна кирип, уятыргъа кюрешгенинде уа, Ислам тауушун чыгъармагъанды. Жашын керти да терен жукъугъа кетген сунуп, ышара тийгенинде, баласыны ариу бети ышара, боллугъу болуп, суууп тура эди. Ма алай бла, жаш адам жюрек ыразылыгъы бла огъурлу жумушха къатышалгъаны къууандыра, керти дуниягъа атланнганды. Баям, жашаууну ахыр кюнлеринде аллай талпыныу, огъурлулукъгъа итиниу, болушуу да кёплеге насып болуп бериле болмаз.

Ислам кесин хар таныгъанына сюйдюргени себепли, къуру ёз юйюрюмю айтсам да, уллубуз-гитчебиз болсун, бек бушуу этгенбиз. Аны аты бир ненча кере сагъынылмай бир кюнюбюз да ёте болмаз.

Былайда башха-башха миллетли жаш тёлюню араларында къуралгъан шуёхлукъ, байламлыкъ, туугъан къарындашлача, бир бирлерине билеклик этиулери махтаугъа тийишлиди. Исламны атасы бла анасы дин тутхан адамла болгъанлары себепли сунама, жангыз жашларындан айырылыу къыйынлыкъны кётюрюр кючню алагъа Уллу Аллах береди. Кюе тургъан жюреклерине сабырлыкъ, тёзюм салады.

Ислам Даловну огъурлу иши, ариу ниети кёплеге юлгю боллукъду, нек дегенде аны чакъырыу видеоролигин къабартылы, таулу демей, бирден бирге ашыра, телефонларында статусларына салгъандыла. Аны биргесине ишлеген къаууму, тенглери Исламны ниетин толтурур муратда шахарны солуу паркында орналып ишлегендиле. Ыйыкъны ахырында тюшген файданы ол сабийни юйюрюне бергендиле, ол заманда, баям, керти дуниядагъы ариу Ислам тамам ыразы боллугъуна ийнанып.

Бу жюрегимден келген хапарымда адамлыкъны юлгюсю болгъан жаш тёлю бла ёхтемленеме. Ислам ариу жаннетледе жатсын, аз жашап, атын эследе къоялгъанды.

Угъай, харекет, ахча, мюлк да тюйюлдю жашауну магъанасы. Жаланда адамлыкъды, халаллыкъды бизни эки дунияда да керти байлыгъыбыз.