Энтта да бир жамауат тийре къуралады

Алгъаракълада билиргенибизча, Нальчикде эртте эт комбинат болуучу, бюгюнлюкде уа танг кесек   жашау журтну къурулушлары баргъан тийреде  жамауат жер къураргъа деп оноу этилген эди. Бу тийре  «Жашау этерге жараулу инфраструктура» миллет проектни «Ырахат шахар болум къурау»  программасына кёре бардырылгъан сайлаулада хорламаса да,  магъаналыгъын тас этмегенди. Нек дегенде алайда жамауат жер болмай жарарыкъ тюйюл эди.  Аны себепли  шахарны оноучулары аны къуралырын тап кёргендиле.

Биринчи кезиуде подряд организацияны келечилери   энчи техниканы кючю бла  сквер боллукъ жерни зыбыр къалгъан-къулгъанладан эм башха затладан тазалап,   къурулушун  башларча  этгендиле. Ызы бла  коммуникацияны тартыу бла байламлы  жумушланы тамамлап бошагъандыла.  Бюгюнлюкде уа  аны айбатландырыу жаны бла мадар этиледи. Ол санда  жаяу жолчукълагъа бла майданлагъа  бордюрла, плитка  эм асфальт  салып кюрешедиле. Жууукъ заманда чыракълы чыпынланы, шинтиклени, кир-кипчик атарча орунланы эм башха затланы     да жерлерине жарашдырып башларыкъдыла.

Проектге кёре, сквер уллу, гитче да заманларын зауукълу ётдюрюрге сюйген  жер боллукъду:  агъачдан омакъ жатмала, ойнаучу, спорт майдалла ишленирикдиле. Тёгерек-башны жашиллендириу, айбатландырыу  жаны бла да  мадар этилликди. Ол санда терекле, юлкюле эм гюлле да орнатыллыкъдыла.    

Эсге сала айтсакъ, жамауат жер шахарны бетин айбатландыргъандан сора да, жангы микрорайоннга  къууат берликди. Ол жамауатны бирикдирген социал магъаналы тийре боллугъуна ишеклик жокъду.