РФ-ни Президенти Владимир Путин устазлагъа тутхучлулукъ этиуню къошакъ амаллары бла байламлы буйрукъгъа къол салгъанды. Аны бла уа педагог усталыкъны энчи даражасы белгиленеди.
Башламчылыкъ «Единая Россия» партияныды, аны мураты уа устазланы усталыкъ даражаларын ёсдюрюудю эмда ишчи эркинликлерин сакълауду.
Анда, сёз ючюн, педагогланы усталыкъ жаны бла айныуларына амалланы къурауну, алагъа ишчи эркинликлени юслеринден юристле берген болушлукъну хакъсыз этиуню, жаш устазлагъа насийхатчылыкъны, къырал электрон билим бериу хазна бла хакъсыз хайырланыуну, бу усталыкъда 25 жыл стажлары болгъанлагъа «Ишни ветераны» даражалы атны бериуню юсюнден айтылады.
Сабийни юйретиуню, аны инсан кёз къарамыны тохташыууну, билимли болуууну эмда усталыкъ жаны бла хазырлыгъыны мурдорларында устазны къыйыны энчиди. Озгъан ыйыкъда битеуроссей усталыкъ эришиулени регион урумларында хорлагъан эмда призёрла болгъан бизни 23 устазыбызгъа премияла бериуню юсюнден буйрукъгъа къол салыннганды. Ала билим бериуде бардырылгъан «Россейде жылны устазы», «Россейде жылны юйретиучюсю», «Жылны устасы», «Ана тилни эмда адабиятны эм ахшы устазы», «Россейни педагогу-психологу» атлы эришиуледе хунерлерин ачыкълагъан устазладыла.
Андан тышында да, КъМР-ни Башчысыны ахча саугъалары дерс олимпиадалагъа эмда бирси билим бериу эришиулеге сабийлени хазырлагъан 50 чакълы устазгъа берилгендиле.
Аллай жетишимлени къыйматлары теренди, аланы хар бирини ызындан келир заманда алимле, инженерле, маданият къуллукъчула, производстволаны къураучула, къурулушчула, юристле, эл мюлкде ишлегенле боллукъ жаш адамла турадыла. Алагъа сакъларгъа тюшерикди бизни хазнабызны эмда къыралыбызны андан ары айныуун да.
Бизни устазларыбызгъа тутхучлулукъ этиу жаны бла амалланы айнытыу ишни, къыралны оноучусуну жангы буйругъуна тийишлиликде андан ары бардырлыкъбыз, деп айтылады КъМР-ни Башчысыны МАХ-да каналында
