Тау жолда иш къыстауду

Экинчи Чегемден Булунгугъа элтген жолну Чегем чучхурладан башлап  тау элге дери 25-километрлик кесегинде тынгылы жангыртыу ишле андан ары бардырыладыла. Бюгюнлюкде анда экинчи къат асфальт жая турадыла. Ол тамам этилгени бла жол шёндю болгъан битеу излемлеге келиширикди, деп айтылады КъМР-ни Башчысыны Администрациясыны МАХ каналында.
Аны бла бирге анда сууланы бир жанына кетерген инфраструктура да къуралады: специалистле жолну тёбен жанын хунала бла кючлейдиле, суу кетерча ызла жарашдырадыла, быргъыла тартадыла. Аны хайырындан жауун эмда къар эриген суула, асфальтны юсюнде жыйылып турмай, бир жанына терк кетерикдиле, анга кёре жол кёбюрек заманны тозурамай турлукъду.
Ишле «Жашау этерча инфраструктура» миллет проектни чеклеринде бардырыладыла. Жолну ол кесегин быйылны ахырына дери тынгылы жангыртып бошаргъа белгиленеди.