Баш борчлары – къыйын болумладан сакълау

Бу кюнледе От тюшюуге къажау къырал надзор служба 99-жыллыгъын белгилегенди. Ол 1927 жылда РСФСР-ни власть органлары «От тюшюуге къажау къырал надзорну юсюнден» бегимни къабыл кёргенлеринден сора къуралгъанды, 2001 жылда уа Россейни МЧС-ини къауумуна киргенди.

Он мингле бла саналгъан адамланы жашаулары, мингле бла саналгъан алгъадан тыйылгъан къыйын болумла – ала барысы да службаны тарыхына киргендиле. Алгъын  жылладача, бюгюн да ол от тюшюуню, ол келтирген болумланы санын азайтыр, ала салгъан хатаны кетерир ючюн кюрешеди.

Бусагъатда бёлюм, МЧС-ни кесеги бола, граждан къорууланыуда, адамланы къыйын болумладан сакълауда эм уллу системаладан бириди. От тюшген къыйын кезиуле азайгъанлары уа анда иш тынгылы къуралгъанына шагъатлыкъ этеди.

Республикабызда орган МЧС-ни жер-жерли бёлюмюню башчысыны орунбасары Мухамед Хажикаровну башчылыгъында ишлейди, аны бойсунууунда 61 инспектор барды, ала борчларын 10 мингден аслам жерде толтурадыла. Юлгюге, быйыл планнга кёре ала къыйын болум чыгъарына къоркъуу эм уллу болгъан жерледе 95 тинтиу бардырыргъа керекдиле. Жылны биринчи жарымында ала 62 жерде болгъандыла,  къоркъуусузлукъну жалчытыуну жорукъларына 297 бузукълукъ табып, аланы тюзетирча эсгертиуле этгендиле, административ бузукълукъланы юслеринден 63 иш ачхандыла.

Былайда бир затны белгилерге керекди: инспекторну баш борчу объектни башчысын жууапха тартыу тюйюлдю, къоркъуусузлукъну жалчытырча ангылатыула, эсгертиуле этиудю. Анга кёре 151 профилактика тинтиуде адамлагъа къоркъуу чыкъмазча эсгертиуле берилгендиле.

Энчи эс жамауат аслам жыйылгъан жерледе, саулукъ сакълау эмда билим бериу учреждениялада къоркъуусузлукъну жалчытыугъа бёлюнеди. Инспекторла мектепледе сабийле бла ушакъла бардырадыла, тюрлю-тюрлю эришиуле къурайдыла, адамла бла да тюбешедиле. Кече-кюн да ала хазырлыкъда турадыла, от тюшгенини юсюнден билдириу келгенлей, аны сылтауларын тохташдырыргъа, мычымай жолгъа чыгъадыла. Аланы, службаны ветеранларын да МЧС-ни регионда Баш управлениясы, усталыкъ байрамлары бла алгъышлай, саулукъ, ырахатлыкъ, жетишимле тежейди.