«Бызынгыны чыранларына» женгил жетерча

Къабарты-Малкъарны Бийик тау къырал заповедниги РусГидро компанияны не жаны бла да болушлугъу бла   «Бызынгыны чыранларына»  экология  жолчукъну тынгылы жангыртыу эмда керек затла бла жалчытыу ишлени башлайды. Энергетика биригиуню бизни республикада бёлюмюнден билдиргенлерине кёре, бу башламчылыкъны хайырындан ол тийре къараучулагъа, тышындан келген къонакълагъа да бютюн  къоркъуусуз, айбат  эмда сейир  болургъа ушайды.

«Бызынгыны чыранларына» жолну тарыхы онеки жыл мындан алгъа башланнганды. Ол кезиуде РусГидро бла бирге заповедник аны 650-метрлик биринчи кесегин ачханды. Аз кечирег а - 2015 жылда - компанияны болушлугъу бла аны узунлугъу 1500 метрге жетгенди. Аны себепли саулай Россейде адамла келип,  жугъутурлагъа къараргъа онг берген жангыз бир жер ма бу заповедник болгъанды.

- Регионлада экология жаны бла башламчылыкълагъа эмда «аяулу» туризмге себеплик этиу РусГидро-гъа магъаналыды. Къабарты-Малкъарны Бийик тау къырал заповедниги бла биз эрттеден бери байламлыкъ жюрютебиз. «Бызынгыны чыранларына» жолчукъ мында жашагъанлагъа, тышындан келген къонакълагъа да белгили  болгъаны бла ёхтемленебиз. Энди уа аны жангыртыугъа къатышып, Кавказны быллай тамашалы табийгъатын сакълаугъа, аны аламатлыгъына, сейирлигине хар ким да хата-заран салмай кёз жетдирирге боллугъуна къошумчулукъ этерге таукелбиз, - дегенди компанияны бизни республикада бёлюмюню башчысы Виталий Тотров.

Заповедникни таматасы Асанланы Зейтун быллай бир жылны ичинде къадар турист келип тургъаны ючюн жолну бир-бир жерлери, анда орнатылгъан затлары да аз-маз тозурагъанларын белгилеп, ол тийрени жангыртмай амал болмазлыгъын чертгенди.

Тийишли ишлени кезиуюнде уа жолну битеу узунлугъунда мадар этилликди, ол санда билдириу стендлени, солуу тийрелени, башха хар нени да жангыртырыкъдыла. Айтханларына кёре, ишлени барын да жууукъ кезиуде бошарыкъдыла, ызы бла жол къонакълагъа жангыдан ачыллыкъды - ол а быйыл октябрьде боллукъду.