Терек бахчачыны усталыгъы бла шагъырейленнгендиле

Къабарты-Малкъар къырал аграр университетде бардырылгъан «Элчини школу» деген проектни чеклеринде анда окъугъанла кёп болмай талай терек бахчачылыкъ мюлкге чыгъып, алгъан билимлерин ишде къалай хайырланыргъа боллугъун кёргендиле, алада ишлегенле бла ушакъ этгендиле, сорууларына, билирге сюйген затларына жууап алгъандыла.

Шагъырейлениу жолоучулукъ «Эльбрусну бахчалары» мюлкден башланнганды. Анда бир кезиуге 30 минг тонна жемиш продукция сыйыннган уллу объект барды. Ол кеси да Нальчик шахарда орналады. Аны тамата технологу къонакълагъа алмаланы бла кертмелени тап халда сакълауну энчиликлерини юсюнден кёп зат айтханды, аланы айырып жыйгъан эмда орунлагъа салгъан оборудованияны кёргюзтгенди, быллай продукция къыралыбызны кёп жерлерине жиберилгенин да билдиргенди.

Ызы бла окъуучуланы къаууму Экинчи Чегемде орналгъан «Ботаник» предприятиягъа баргъандыла. Аны терк айныгъан бахчаларында алманы жыйырмадан артыкъ сортун ёсдюредиле. Къонакълагъа анда болгъан онгланы кёргюзтгендиле, ол санда тереклеге суу салгъан, семиртгичле берген, дарман сепген системаланы да.

Андан чыкъгъанларындан сора «Элчини школуну» келечилери «Фрукт-Трейд» ООО-гъа къайтхандыла. Бу мюлкде, аны келечилери билдиргенлерине кёре, «Миариса» деген ат бла жемиш суула эмда алма къатханла чыгъарадыла. Продукция бары да битеу хайырлы затлары, ол санда витаминлери кёбюрек сакъланырча аллай амалла бла этиледи.

Терек бахчачылыкъда изленнген абериле чыгъаргъан «Базис» предприятияда уа къонакъланы бетон чыпынла, буз ургъандан къоруулагъан аула, пластикден орунла чыгъарыу къалай къуралгъанын, сора кеслерини алма бахчаларын эмда орнатыргъа хазырлагъан терекчиклерин кёргюзтгендиле. Аны продукциясына къуру Россейде угъай, башха къыраллада да барды сурам.

Алай бла «Элчини школуну» келечилери бир кюнню ичинде талай  инновациялы производствода болгъандыла, аланы башчылары бла тюбешгендиле, кеслерине хайырлы къадар информация алгъандыла.