Сынаулары, насийхат сёзлери, къайгъырыулары бла да жарагъанлай турадыла

ФСИН-ни КъМР-де Управлениясыны аппаратында уголовный-толтуруучу  системаны ветеранларыны регион жамауат организациясыны жыйылыуу болгъанды.Аны ишине  ведомствону таматасыны юйретиу иш жаны бла  орунбасарлары да къатышхандыла. Жыйылыуну  Ветеранланы советини  таматасы, ич службаны отставкада полковниги  Кючменланы Мухтар  ачханды эм бардыргъанды.

Биригиу отчёт кезиуню ичинде тамамлагъан ишлени юсюнден а аны башчысыны орунбасары,  ич службаны отставкадагъы  полковниги Анзор Сасиков билдириу этгенди. Ол  ветеранла  бу усталыкъгъа кёре энди ишлерге  келген жаш адамлагъа сынауларындан юлюш этгенлерин, жамауат  бу     системагъа кёз къарамын тюрлендирир ючюн да уллу иш тамамлагъанларын чертип айтханды.

-Ала республикада бардырылгъан къырал байрамлагъа, башха жыйылыулагъа, тюбешиулеге да тири къатышадыла.  УФСИН-ни  бёлюмлерине барып, анда тутмакъла бла тюбешедиле, ушакъла бардырадыла. Акъылбалыкъ болмагъанлагъа энчи эс бурадыла. Уголовный-толтуруучу бёлюмде тюрлю-тюрлю жыллада къуллукъ этгенлени атлары унутулмазча этиуге да къайгъырадыла. Аланы юслеринден   музейге материалла, суратла жыйышдырыу бла кюрешедиле,-деп къошханды докладчы.

Ол  Уллу Ата журт урушну ветеранларына, саусузлагъа, инвалидлеге, баш иелери урушда жоюлгъан тиширыулагъа  совет энчи къайгъыргъанын да белгилегенди.  «Аланы кеслерин, юйюрлерин да дайым жокълагъанлай, юбилейлери бла алгъышлагъанлай, не кереклери бар эсе да, билип, аны да тапдырыргъа кюрешгенлей турабыз»,-деп,  Анзор Сасиков Уллу Хорламны 75-жыллыгъына ич службаны отставкадагъы полковниги Залимгерий Шогемов  республиканы УИС-инде къуллукъ этгенлени юсюнден  талай китап басмалагъанын да билдиргенди.

Ахырында ол  ФСИН-ни КъМР-де Управлениясыны оноучуларына ала ветеран организациягъа  хар не ишлеринде да дайым себеплик этгенлери ючюн ыразылыгъын айтханды.