Тёлюлени араларында байламлыкъланы кючлей, маданиятны да сакъларгъа

Къабарты-Малкъарны Жамауат палатасыны Элбрус районда болгъан жыйылыуунда сёз миллетчилик эмда дин экстремизмни жолун кесиуню юсюнден баргъанды.

Жыйылыу палатаны граждан обществону институтларын айнытыу, миллетле эм динле аралы халланы игилендириу, НКО бла байламлыкъла жюрютюу жаны бла комиссиясыны башламчылыгъы бла «Миллетчилик эм дин экстремизмге къажау ишни бардырыу, тёрели тин-ниет хазнаны, кёп миллетли Россейде граждан бирликни сакълауда, осал ниетлени къуугъанлагъа къажау турууда коммерциялы болмагъан организацияла бла байламлыкъла жюрютюу» деген темагъа аталгъанды. Жыйылыугъа власть органланы, жамауат биригиулени келечилери, маданият эм илму ишчиле, устазла да къатышхандыла.

Билдирилгенича, бюгюнлюкде Элбрус районда отуздан аслам миллетни келечилери жашайдыла, процентлени келтиргенде, тарихле былайдыла: таулула – 73,47 процент, къабартылыла – 8,82, оруслула – 13,14, 4,75 проценти бирси халкъладандыла. Дин махкемелени юсюнден айтханда, онбир межгит бла бир правосланый килиса бардыла. Районну администрациясыны башчысы Отарланы Мухтар белгилегенича, миллетле аралы халланы игилендириу иш Россейни законодательствосуна эмда «Къабарты-Малкъарны Элбрус районунда 2025-2027 жыллада къырал миллет политиканы толтуруу» муниципал программагъа кёре тамамланылады. Аны мураты Россейли  тёрели тин-ниет хазнасыны мурдорунда хар не жаны бла да айныгъан, журтун сюйген эм анга кертичи болгъан, социал жууаплылыкъны сезген инсанны ёсдюрюудю, юйретиудю.

Элбрус районну жамауат палатасыны келечиси Селяланы Азреталий миллетле эм динле аралы халланы кючлеуню чегинде коммерциялы болмагъан биригиулеге да эс бёлюрге кереклисин чертгенди. «Ол мурат бла НКО-ланы келечилери байрам ишлени къураугъа тири къатышадыла, алагъа информация, ангылатыу, ахча-мюлк жаны бла себеплик этиледи», - дегенди ол.

Районну администрациясыны жаш тёлю политика жаны бла бёлюмюню башчысы Атмырзаланы Алиса маданият эм билим бериу учрежденияла маданият энчиликлени, тёлюлени араларында байламлыкъланы сакълаугъа аталгъан ишни тири бардыргъанларын билдиргенди: «Энчи эс маданият кёп тюрлюлюкню тас этмеуге, огъурлулукъну, бир бирге, бютюнда уа чекленнген онглары болгъан адамлагъа къайгъыра билиуню ниетлерин жайыугъа, тенгликни сакълаугъа бёлюнеди. Тёрели халда имамла бла тюбешиуле, «Магъаналы ушакъ» деген дерсле къураладыла. Болумну эсепде тутар ючюн а, хар юч айдан бу жаны бла хал тинтилгенлей турады».

Муслийманланы дин управленияларындан Джамбулат Керефов, ислам динни огъурлулугъун туура этерге, ахшы тёрелерибизни жангыртыргъа тийишлисин белгилей, жамауатны къоркъуусузлугъун сакълауда къырал бла дин биригиуле кючлерин бирикдирирге керек болгъанларын айтханды. МВД-ны районда бёлюмюню башчысы орнубасары Руслан Дзуганов а тыш къыралланы инсанлары районда къаллай болгъанлары, къайда уруннганлары бла шагъырей этгенди.

Ахырында жыйылыуну бардыргъан, палатаны граждан обществону институтларын айнытыу, миллетле эм динле аралы халланы игилендириу, НКО бла байламлыкъла жюрютюу жаны бла комиссиясыны башчысы Руслан Токов тынчлыкълы миллетле эм динле аралы халланы жалчытыу жер-жерли самоуправление органланы, миллет маданият араланы бла граждан обществону башха институтларыны биригип ишлегенлерини эсеби болгъанын чертгенди. «Жамауат биригиуле аны ючюн уллу къыйын салгъанлары эсленеди. Болсада, кёп миллетли эм кёп динли республикада мамырлыкъны бла келишиулюкню сакълау къыралны, адамланы да жанындан дайым да эс бёлюуню излегенин унутмазгъа керекди. Былайда баш магъаналы борчубуз ол бирликни кючлеудю, миллет биригиулеге себеплик этиудю», - дегенди ол.

Жыйылыуну эсеплерине кёре, сейирлери болгъан ведомстволагъа бла органлагъа эсгертиуле жарашдырылгъандыла.