Усталыкъларында ёсерлерин тежегендиле

Къабарты-Малкъар къырал университетни Менеджмент, туризм эм къонакъбайлыкъны адети институтунда туризм эм къонакъбайлыкъ жаны бла усталыкъ алгъан адамлагъа дипломларын бергендиле.

Къууанчлы халда дипломларын «Менеджмент», «Туризм», «Къонакъ юйле бла байламлы иш» деген усталыкълагъа кёре бакалаврла бла магистрле алгъандыла. Аланы республиканы Курортла эм туризм министерствосуну туризмни айнытыу, курортла эмда эркинликле бериу жаны бла бёлюмюню башчысы Виолетта Каскулова алгъышлагъанды. «Министерствону атындан окъууугъузну жетишимли бошагъаныгъыз бла алгъышлайма. Сиз эм сейир, жууаплы, терк айныгъан да усталыкъладан бирин сайлагъансыз. Бюгюнлюкде адамланы солууларын къурау жангызда экономиканы бёлюмлеринден бири болуп къалмайды, ол маданиятны байыкъландырыу, халкъла аралы байламлыкъланы кючлеу, регионлада халны игилендириу жаны бла да уллу ишни тамамлайды. Алгъан билимигиз журтубузугъа хайыр келтиририн тежейме. Сора, кесигиз да жолоучулукъланы къоймагъыз деп, насийхат этеме. Башха адамланы кёллендирир кючю жангызда тутхан ишин сюйген адамны барды», - дегенди ол.

Дипломланы выпускниклеге регионну бу жаны бла баш организацияларыны келечилери да – «АСТИ ГРУПП» биригиуню башчысы Астемир Ныров, «Курорт «Нальчик» обществону таматасы Хасанби Афов, «Гранд-Кавказ» къонакъ юйню башчысы Лариса Бабугоева – бергендиле.