Ток ызланы къатларында чабакъ тутмагъыз

Жай жылыула келгени бла адамла заманларын суу боюнунда, кёлледе да ётдюредиле. Алай быллай солуу,  зауукълукъдан сора, къоркъуу да келтирирге боллукъду. Сёз мында ол тийреледе электрокюч ызла тартылып тургъанда къоркъууну юсюнден барады, дейдиле «Каббалкэнергода».

Энергетикле билдиргенлерича, бийик вольтлу ток ызлагъа жууукъ барыргъа чыртда жарамайды. Сёз ючюн, кючю бир киловольтха жетмеген ызланы неда энергетика объектлени тёгереклеринде къоркъуусузлукъ тийрелери эки метр бла чекленеди. Андан кючлюленики уа жыйырма метрге окъуна жетерге боллукъду. Алайлада чыпынлагъа ёрлерге, кёлледе бла черекледе чабакъ тутаргъа жарамагъанын ангылатхан эсгертиу белгиле орнатыладыла: быйыл аллайладан жюзюсюн тагъарыкъдыла.

Энергетикле дагъыда кёк кюкюрегенде чабакъ тутаргъа жарамагъанын да эсгертедиле. Кюнню халы тюрленип, булутла да жууукъдан- жууукъ келип башласала, чабакъ тутууну олсагъат къоюп, кёлден не къадар узакъгъа кетерге керекди. Белгилисича, суу токну болмагъанча иги ётдюреди. Элия кёлге урса, ол аны жагъасындан жер бла энтта да жюз метр тёгерекге жайылады. Бирледе уа элия суугъа угъай, кёлню къатында жерге да урургъа болады. Аны ючюн, айтылгъаныча, ол тийреден терк къутулургъа керекди.

 Бузукълукъ этилгенни неда жарсыулу иш болгъанын эслесегиз, «Россети Шимал Кавказ» компанияны 800-220-0-220 деген сау кюнню ишлеген телефон номери бла сёлешип билдиригиз.