УФСБ: Ичги затла сыйырылгъандыла

Россейге тышындан жашырын келтирилген продукциягъа къажау излеу-тинтиу жумушла бардыргъан кезиуде РФ-ни Къоркъуусузлукъну федерал службасыны КъМР-де Управлениясыны къуллукъчулары Краснодар крайда УФСБ-ны келечилери бла бирге республиканы эки инсаныны бла краснодарчыны аманлыкъчы ишлерин тохтатхандыла. Ала аракъыны законсуз сатыу-алыугъа къатышханларына ишеклик барды. 
УФСБ-ны пресс-службасындан бизге билдиргенлерича, законсуз сатыу-алыудан 6,4 минг литр ичги затла сыйырылгъандыла. 
РФ-ни УК-сыны 171.3-чю статьясыны 2-чи кесегини «а» пунктуна бузукълукъ этилгени бла байламлы терслеу иш ачылгъанды. Законлада жазылгъаныча, быллай аманлыкъ этгенни эркинлиги 5 жылгъа дери сыйырылыргъа боллукъду.