Кеф адамгъа чекле жокъдула

РФ-ни Саулукъ сакълау министерствосу 29 июньдан 5 июльгъа дери жараладан, башха тыш сылтауладан ауушханланы санын азайтыуну ыйыгъын бардырады. Аны чеклериндеКъМР-ни Саулукъ сакълау министерствосуну Психиатрияны бла наркологияны клиника арасыны врачы-наркологу Альберт Кабалоев аракъыдан неда наркотикледен эсирген адам кесине эмда тёгерекде адамлагъа къаллай къоркъуу келтиргенин ангылатады.

- Эсирген адам «къууанчлы» ингирден сора къаллай къыйын болумлагъа тюшгенин бизни врачла кюн сайынча кёредиле. Кеф адамгъа чекле жокъдула, ол бир затдан да къоркъмайды, къайгъырмайды, тёгерегинде болумгъа тюз багъа бералмайды. Аны хатасы уа къуру кесине угъай, башхалагъа да жетеди,-дейди нарколог.

Кефле тюйюшген, жагъалашхан видеола интернетде кёпдюле, алагъа кюлкюню тыялмай къарайса.Алай жашауда уа къууанырча тюйюлдю – тюйюшген кезиуде салыннган жарала ауурдула, бирде мурдарлыкъгъа окъуна жетедиле.

- Бек къоркъуулула уа эсирип, машинада жолгъа чыкъгъанладыла. Кеф водитель жолда болумгъа тюз багъа бералмайды. Чырмауну кёрюп, машинаны тохтатханда,орта эсеп бла адам 0,2 секунда къоратады, алай эсиргеннге уа 1,5 секунда кетеди. Бу заманны ичинде машина бек аздан 30 метр барлыкъды. Ол къызыу келгенде уа къаллай хата салыргъа боллугъун кесигиз да ангылайсыз,-дейди ушакъ нёгерибиз.

Дагъыда эсирген балкондан жыгъылгъан, неда тютюнню къабындырып, жукълап къалгъан кезиуле да аз тюйюлдюле. Кеф адам ачыуланыргъа ёчдю, аны хатасы уа юй бийчесине, сабийлерине жетеди. «Адам ичгичиликни кеси ючюн багъаргъа унамай эсе да, тёгерекде жууукъларыны юсюнден сагъыш этерге керекди. Кеси болалмагъаннга уа бизни клиникада болушургъа битеу онгла бардыла»,-дейди Альберт Кабалоев.