Ёсюп келген тёлюню аманлыкъладан къорууларгъа алланып

Солуу кезиуде сабийлени къоркъуусузлукъларын жалчытыугъа аталгъан жыйылыулагъа юч жюзден аслам ата бла ана къатышхандыла. Аллай тюбешиуледен бири Тырныауузда Къулийланы Къайсын атлы Маданият юйде да бардырылгъанды. Анга районну башчысы Отарланы Мухтар, право  низамны сакълаучула, наркологла да къатышхандыла. 

Аны башлай, Отарланы Мухтар сабийлени бла жаш адамланы законлукъгъа, низамлыкъгъа, жамауат жорукълагъа, Ата журтну сюерге  юйретиуню магъанасы уллу болгъанын чертгенди. Акъылбалыкъ болмагъанланы аманлыкъладан сакълаугъа энчи эс бурургъа кереклисин да эсгертгенди.

Тюбешиу ачыкъ ушакъ халда баргъанды. Полициячыла шёндюгю заманны къоркъууларын ангылатхандыла эмда тапсыз болумгъа тюшмез ючюн, жаш адам кесин къалай жюрютюрге кереклисин билдиргендиле.

Право низамны сакълаучула сабий нёгерлерин сайлаугъа жууаплы кёзден къараргъа, солуу кезиуню  ётдюрюуню юсюнден иги сагъыш этерге кереклисин эсге салгъандыла. «Социал сетьледе ким бла ушакъла бардыргъанларын кёпле билмейдиле, анга сансыздыла. Алай хата андан башланыргъа боллукъду», – дегендиле кенгешде сёлешгенле.

Къырал автоинспекторла уа акъылбалыкъ болмагъанла тюшген аварияланы сылтауларыны юслеринден айтхандыла. Бир-бир ата-анала сабийлерине мотоциклле алгъанларын, окъууда жетишимлери ючюн машина саугъалагъанларын терслегендиле, ол ишлени ахыры хата бла бошалыргъа боллугъун эсгертгендиле. «Машинаны жюрютюрге эркинлиги болмагъаннга жолгъа чыгъаргъа ышандыгъыз эсе, аны бла игилик угъай, бютюн аманлыкъ этесиз. Ол, къуру кесини къой, башхаланы жашауларына, саулукъларына къоркъуу салады», – деп белгилегендиле инспекторла.

Сёз наркотиклени, аракъыны, тютюнню, башха уулу затланы сабийини мыйысына салгъан хатаны юсюнден да баргъанды. Нарколог сабий ууну ичгенине ишеклик бар эсе, аны бла къалай сёлеширге керегин ангылатханды, анга заманында бакъдырыргъа кереклисин эсгертгенди.  

Ахырында жыйылгъанла таматала сабийлени саулукълары ючюн жууаплы болгъанларын белгилегендиле. Ёсюп келген тёлюню шёндюгю заманны къоркъууларындан сакълар ючюн а, юйюр, школ, къырал органла бла жамауат биригирге кереклисин айтхандыла.