Иги сёз тюз жолну кёргюзтюр

Быллым элни сабий садын быйыл 10 сабий бошагъандыла. Аланы мектепге ашырыу а мында энчи халда  ётгенди. Энчилиги недеди десегиз, юйретиучюле битеу байрам программаны ёз тилибизде къурап бардыргъандыла. Аны ючюн ала энчи ыспасха бла махтаугъа тийишлидиле.

Барыбыз да билгенликден, шёндю ана тилибизде сабийлени, абаданланы да иги кесеги къыйналып сёлешедиле. Бу сабий саддан бизге видеороликлени ийгенлеринде уа, кёзюмю айыралмай къарагъанма. Юйретиучюле Толгъурладан Фатима, Жаннет, Камилла, Ёлмезланы Танзиля, музыка ишчи Хаджиланы Марина, методист Атаккуланы Жамиля къызчыкъланы бла жашчыкъланы бу эслеринде кёпге сакъланырыкъ кюннге аламат эм бай малкъар тилибизде хазырлагъандыла. Кертисин айтханда, сабий садлада тилибизге быллай уллу магъана берилгенин биринчи кере кёреме. Башхала да быладан ахшы юлгю алырла деп, ийнанырыгъым келеди.

Алайды да, байрам а хар сабийни энчи сахнагъа чакъырыудан башланнганды. Юйретиучюле, аланы хар бирини къылыгъын бла халин эсге ала, назму тизгинле къурап, жыйылгъанланы алларына алай чакъыргъандыла. Ала тутхан ишлерин, сабийлени да бек сюйгенлерини белгисиди ол деп, мен алай къарайма.

Ары келген ата-аналаны, ынналаны бла аппаланы алларында уа алгъыш сёз бла сабий садха кёп заманны башчылыкъ этип келген Афашокъаланы Зита сёлешгенди.

- Сизни атыгъыз «Жулдузчукъла» болгъанды. Бюгюнлюкде сиз ол атха тийишли болгъаныгъызны кёргюзтгенсиз. Ата-аналарыгъыз бизге сизни гитчечиклей алып келген эдиле. Бюгюн а сиз хар биригиз бла да ёхтемленирча къызчыкъла бла жашчыкъла болгъансыз. Школда да ахшы белгиле алып, жетишимле болдурлукъларыгъызгъа ийнанама. Ахшы жолгъа барыгъыз! – дегенди Зита Магомедовна.

Ызы бла уа сабийле бла юйретиучюле къонакълагъа деп хазырлагъан концерт программаларын кёргюзтгендиле. Ана тиллерине уста болгъанларын а «Иги сёз» деген жырны айтыулары бла ачыкълагъандыла. Ызы бла уа – назму тизгинле, миллет тепсеуле, жырла, сахна оюн...  Была барысы да келгенлени кёллерин кётюрюуге, байрам халны кючлеуге уллу себеп болгъандыла. Ынна туудугъун эрттенликде школгъа къалай ашыргъаныны юсюнден сахна оюн бла уа юйретиучю Ёлмезланы Танзиля къараучуланы кюлдюрюп, зауукълукъ тапдыргъанды.

Миллет кийимлени шёндюгю омакъ жыйрыкъчыкъла бла костюмла алыша эдиле. Ата-анала, юйретиучюле да бир тилли болуп, аламат байрам къурагъанлары уа махтаугъа тийишлиди. Не жаны бла да тутхан ишлерине жууаплы кёзден къарагъанлары да башхалагъа ахшы юлгюдю.

Быллымны сабий сады ачылгъанлы 62 жыл болады. Аны биринчи таматасы Къумукъланы Лялюша эди. Бюгюнлюкде уа ол жумушну къызы Афашокъаланы Зита бардырады. Ол ишни къурай билгенине уа ма бу жарыкъ байрам да шагъатлыкъ этеди. Кеси миллетине, ёз тилине сый бере билиу, аны тамблагъы кюню бюгюн бла къаты байламлы болгъанын ангылау а кёпню тутады. Юйретиучюле бла бир бирни ангылап, башламчылыкъларына онг тапдырыу, кертиси бла да, уллу хунерди. Зита Магомедовна аллай башчы болгъанына ишек жокъду.