Бийикликден парашютсуз тюшюуден жараула

МЧС-ни регионда бёлюмюнден билдиргенлерине кёре, Уштулуда ведомствону Элбрус бийик тау излеу-къутхарыу отрядыны къаууму МИ-8 вертолётдан парашютсуз тюшюуден жараула бардыргъанды. 

 

Быллай юйрениуле къутхарыучуланы усталыкъларын игилендириуге себеплик этгенлеринден тышында, эм къыйын тау жерледе ачыгъанлагъа болушлукъну терк тапдырырча хазырлыкъларын да ёсдюредиле. Бу жол жараула 2 минг метрден аслам бийикликде ётдюрюлгендиле. Отрядны башчысы Гюлюйланы Мухаммат айтханыча, вертолётдан быллай амал бла тюшюу эм къыйын борчладанды. «Жарауланы кезиуюнде къутхарыучула авиация къыйын тау жерлеге киралмай къалгъанда ачыгъанланы къоркъуусуз жерге тапдырыуда, алагъа биринчи болушлукъну этгенде сынам жыядыла», - дегенди ол.     

 

Эсигизге салайыкъ, МЧС-ни Элбрус бийик тау излеу-къутхарыу отряды республикада жашагъанланы, бери келип солугъанланы да къыйын болумлада къоркъуусузлукъларын жалчытыугъа жууаплыды. Бюгюнлюкде анда 90 инсан урунадыла, алада хайырланыуда 47 техника керек барды. Отряд Терскъолда орналыпды, ол ишин Баш Кавказ тауланы аслам кесегинде тамамлайды, солугъанла эм кёп келген кезиуледе дежурный къалауурлукъну элтеди. Быйыл къутхарыучула ачыгъанлагъа болушургъа 16 кере чакъырылгъандыла.