Гитче болгъанларына да къарамай, къоркъуулу аурууланы жаяргъа ёчдюле

Роспотребнадзорну Къабарты-Малкъарда  управлениясындан билдиргенлерича,  чычханла кёп тюрлю къоркъуулу жукъгъан аурууланы жайгъан  жаныуарлагъа саналадыла.

 Аланы кирлерини къурамында   къоркъуулу бактерияла бла вирусла бардыла. Ол себепден аш-суу жюрюген жерле  тазалыкъда сакъланырларына  сакъ болургъа тийишлиди.

  Андан сора да, ала битлени  бла бюрчелени да  жаядыла. Ала адамны къапсала уа, бир тюрлю аурууну къозгъаргъа боладыла.

 Чычханла жайгъан аурууланы аслам тюбегенлери, бек   къоркъуулулары да боладыла: къутургъан ауруу, лептоспироз, сальмонеллез, туляремия, геморрагия безгек, эмина.

Къутургъан ауруу жаныуар къапса неда тюкюрюгю бла жугъады. Ол  саусузну ара нерва системасын бийлейди эм заманында вакцина этилмесе  ёлюмге неда башха къыйын болумгъа келтирирге боллукъду. Андан къыйналгъанланы башлары  ауруйду, санлары тюшеди, къутурургъа ёч боладыла  эм башха шартла да ачыкъланадыла.  Болсада кёбюсюнде ол чычханладан башха жаныурладан жукъгъанын да белгилеп айтырчады.

Лептоспироз  ауругъан жаныуарны сийдиги бла жугъады. Аны кезиуюнде безгек тиеди, башлары, шаугютлери ауруйду,   бюйреклери бла  бауурлары да къыйнаргъа  болады.  Сальмонеллез  адамгъа аш-суу бла жугъады, ичин ётдюреди, безгек тийип  къыйнайды  эм къарыны да тутады.

Туляремия битле къапсала, жаныуаргъа тийсе  неда чычханла жюрюген жерде букъуну жутханда жугъады. Ол да безгекни къозгъайды, безлери  кёпчюйдюле эм териси да  чагъады. Геморрагия безгек чычхан кир этген  букъуну жутханда жугъады. Аны кезиуюнде безгек тиеди, башы ауруйду, къарыны эм бюйреклери да тутады. Эмина уа  битле къапсала  жугъады. Аны хатасындан безгек тиеди,  безлери кёпчюйдюле эм пневмония да къозгъалады.  

 Сагъынылгъан аурууладан сакъланырча эм иги амалладан бири профилактика бардырыуду. Ол санда юйню тазалыкъда тутаргъа, кир-кипчикни заманында кетерирге, аш-сууну юслерин иги жабаргъа тийишлиди.

 Къабыргъада тешик неда жарылгъан жер   эслесегиз, созмай бегитирге керекди.   Аладан  чычханла тынч киредиле. Ала болгъан жерде  къапхан неда ууландырырча препарат салса керекди. 

Заранлы жаныуарла жашагъан жерни  тазалагъанда къол къакъла, маскала киерге тийшлиди. Бошагъандан  сора,  къолларыгъызны  сапын бла иги жууаргъа унутмагъыз.

Чычхан къапса неда башында  сагъынылгъан ауруула бла байламлы бир тюрлюсюне ишекли болсагъыз,  созмай тюз диагноз салырча  врачха барсагъыз уллу хатадан сакъланыргъа боллукъсуз.

Белгилисича, чычханла бла къоншулукъгъа  адамгъа жаланда   заран келтиргени себепли  ол аладан къутулургъа излегенди.  Саулукъгъа уллу хата салыргъа боллукъларын  эсге алсакъ, анга энчи бютюн эс  бурургъа тюшеди.