Иш кёллюлюгю башхалагъа да жарагъан

Къабарты-Малкъар къырал университетни электроника, робототехника эм жалгъан акъыл  жаны бла институтуну экинчи курсунда окъугъан Мансур Оздо  Шимал Кавказны жаш тёлю  туризмни былтыр Архызда ётген «Координата – 2025» деген форумунда хорлап, Жаш тёлюню ишлери жаны бла федерал агентстводан 490 минг сом чакълы алгъанды. Алай бла сварщиклени хазырлау жаны бла «Вершина» проектин бардырыргъа онг тапханды. Андан бери Мансур  къыйын болумгъа тюшген юйюрледен 80-ден  аслам тенгине  усталыкъ алыргъа болушханды. Аланы экиден бири байламлыкъ жюрютюлген предприятиялада - Нальчикде «Металлстрой» бла  Ингушетияны къурулуш биригиулеринде - жетишимли уруннгандыла.

Проектге кёре жаш адамла бюгюнлюкде сварщик усталыкъдан изленнген жумушлагъа юйренедиле. Аны кезиуюнде сынамларын ёсдюрюуге аслам эс бериледи. Дерсле ыйыкъгъа эки кере хакъсыз бардырыладыла.

- Берилген ахчагъа цехни ортакъгъа алгъанбыз эм Toros бла Avrora аппаратла къоллу болгъанбыз. Бизде 6-8 жыл ишлеген сынамлы специалистле юйретедиле. Аны хайыры бла къысха заманда иги усталаны хазырларгъа къолубуздан келеди. Ол  санда техника жаны бла къоркъуусузлукъну билирча да этебиз.  Курсланы ётгенлени тёртден бири  жерлешлерибиздиле, къалгъанлары уа Ингушетиядан келгенледиле,-  дейди Мансур Оздо.

Предприниматель айтханнга кёре, бюгюнлюкде СКФО-да ишчи рынокда сварщик усталыкъгъа уллу сурам барды. Сёз ючюн, сынамлы специалистни айлыгъы 60-100 минг сомгъа жетеди. Аны себепли, тыш регионлагъа кетмей,  хар ким кеси жеринде уруналлыкъдыла.  

Келир заманны юсюнден айтханда, Мансур мындан арысында да ишин айнытыргъа таукелди. Анга кёре проектин  кенгертирге, окъуучуланы санын кёбейтирге,   грантла алырча федерал проектлеге да тири къатышыргъа мурат этеди.