Къалай терк озду ол зауукълу кезиу

Биз, озгъан ёмюрню 50-чи жылларында туугъан хасаниячыла, 16-чы номерли орта школну бошап чыкъгъанлы элли алты жыл болуп келеди.

Бюгюнлюкде арабызда кёп сабийли ыннала, аппала, къырал къуллукълада ишлегенле, къурулушчула, врачла, устазла, ишчиле, алимле, предпринимательле, солууда болгъанла да бардыла. Бизни классда окъугъан жашланы, къызланы кёбюсю кеси заманларында энчи эм бийик билим алгъандыла. Усталыкъларын, билимлерин да жашауда уста хайырланадыла.

Мен классыбызны жыйырма алты жыл мындан алгъа тюбешгенибизде алыннган суратха къарап, кёп затны эсиме тюшюреме,биргеме окъугъан жашланы бла къызланы  тансыкълайма. Бюгюнлюкде аладан бир ненчасы, жарсыугъа, дунияларын алышхандыла. Къалай къууаннган эдик бир бирибизни кёргенде.

Алгъынча, чам  атларыбызны айтып, кюле эдик. Классыбыз  шуёх класс болуучу эди. Сентябрьни ашыгъып сакълагъанбыз. 23 февральда уа, бир къауум къыз болуп, тюкенден жашларыбызгъа кёбюсюнде спорт керекле  алып, саугъа этер эдик. 8 мартда уа жашларыбыз а бизни гюлле, саугъала бла да алгъышлар эдиле.

Жаз башы жетип, жер  къургъакъсыгъанлай а, темир сыныкъла, эски газетле, журналла жыяргъа чыгъа эдик. Бюгюнча эсимдеди, бизни классны темир сыныкъланы хар кимден да кёп жыйыучусу. Ол жаны бла биз школда алчыла болгъанбыз.

Кёп жылланы класс башчыбыз биз бек сюйген Бёзюланы Масхутну къызы Зухура болуп тургъанды. Аны башчылыгъы бла классыбыз кёп тюрлю ишлеге къатыша эди. Ол орус тилни бла адабиятны дерслерин бардыргъанды. Къызларыбыз анга ушаргъа итиннгендиле.

Абадан класслада уа класс таматагъа Серафима Харитоновна Чеджемованы саладыла. Аны бла уа биз  агъачха, суу боюнуна, шахар паркга баргъанбыз. Бир жол а ол бизни аэропортха да элтгенди. Лётчикле  бизге самолётну ичин, тышын да кёргюзтгендиле. Аланы хапарларына биз сейир этип тынгылагъанбыз, артда уа  кёп соруула да бергенбиз.

Классыбызда иги окъугъанланы суратлары школда хар ким да кёрюрча жерде тагъылыучу эдиле.  Кючюкланы Фатимат, Баккуланы Люба, Сумайланы Камал, Аналаны Маржан, Созайланы Аскер, Тёппеланы Жамал, дагъыда башхала айырмалы окъуучуларыбыз болгъандыла. Немис, ингилиз тиллеге хунерлери болгъанла да бар эдиле. Аладан бири Тюргельдиева Зухура эди. Ол КъМКъУ-ну тыш къыраллы тилле бёлюмюн бошап, тилманчлыкъ этип, дунияны кёп къыралларын кёргенди, артда кандидат диссертациясын да къоруулагъанды, бусагъатда Искусстволаны Шимал-Кавказ къырал институтунда немис тилден окъутады, кёп илму монографияланы, ол санда  Инна Кашежеваны чыгъармачылыгъыны юсюнден китапны авторуду.

Деппуланы Азиза да тарых илмуланы кандидатыды. Ол  Нальчикде Миллет музейде кёп жылладан бери ишлейди, бёлюмге башчылыкъ этеди. Къужонланы Фатимат Ич ишле министерствосуну санчастында администратор болуп уруннганды. Аппайланы Мариям юч сабийни анасыды, предприниматель иш бла кюрешгенди. Холаланы  Галина да юч къыз ёсдюргенди, кесини ишин къурап, аны бардырады. Холаланы Алий агъач усталыкъда  ишлегенди. Юйюрю-юйдегиси бла тап жашау къурагъанды, жаш бла къыз ёсдюрюп, алагъа бийик билим берирча  онг этгенди, бусагъатда юч туудугъун ёсдюреди.

Кючюкланы Фатимат КъМКъУ-ну бошап, «Синергия» университетде студентлени окъутады,  жети сабий  ёсдюргенди, туудукълары да кёпдюле. Бюгюнлюкде илму ишин къорууларгъа хазырлана турады. Аны айтханым, окъургъа бир заманда да кеч тюйюлдю.

Жангоразланы Рамазан, дуниясын алышхынчы, «РЭЛА» фирманы таматасы болуп тургъанды, кёплеге терезе, эшик ишлеп, саугъагъа  бергенди. Къубадийланы Адальбий да, жарсыугъа, дуниядан замансыз кетгенди. Ол республиканы «Агрохимслужбасыны» малчылыкъны химизациялау бёлюмюню таматасы болуп тургъанды. Сумайланы Камал, Бичиланы Магомет да КъМКъУ-да бийик билим алып, кеси ишлерин къурап, аны тынгылы бардырадыла.

Хочуланы Хызыр а Нальчик шахарны администрациясыны къурулуш жаны бла бёлюмюне талай жылны башчылыкъ этгенди, бюгюнлюкде Акъ-Суу элге баргъан жолну сол жанында питомникге башчылыкъ этеди, Къудайланы Назир, эл мюлк жаны бла бийик билим алып, кёп жылланы Россейде уллу  колхозгъа башчылыкъ этип тургъанды. Бусагъатда предприниматель иш бла  кюрешеди. Атларын  иги бла айтдыргъан бир класслыларыбыз дагъыда кёпдюле. 

Битеу бир класслыларым къырал, энчи иелик ишде  жетишимли болгъанларыча, ахшы юйюрле, туудукъла, энди уа аладан туугъанланы да ёсдюредиле.

Бизни зауукълу школ жылларыбыз артда къалгъандыла. Бюгюнлюкде тюбешсек, асламында сабийлерибизни, туудукъларыбызны жетишимлерини юслеринден айтабыз, ала бла ёхтемленнгенибизни букъдурмайбыз. Жашау кесини ишин этеди. Анда бушуу, къууанч да бирге барадыла.

Школну ол замандагъы директору  Холаланы Хусейинни жашы Якуб эди. Анга окъуучула, устазла да уллу хурмет этгендиле. Ол дерследе ахшы белги салыргъа бир заманда да ашыкъмагъанды, болсада аны «ючю» башхаланы «бешлери» кибик эди.

Устазларыбызны атларын да унутмагъанбыз. Теммоланы Лидия Таукаевнаны, Чочайланы Хусей Ибрагимовични, Иван Васильевич Марченкону, Чочайланы Аминат Махмудовнаны, Ажоланы Шама Хакимовнаны, Раиса Шупаговна Шуеваны, Лилия Григорьевна Кузьминаны, Серафима Харитоновна Чеджемованы, Бёзюланы Зухура Масхутовнаны, дагъыда  кёп башхаланы жюрек ыразылыкъ бла эсгериучюбюз.

Бирге тюбешсек, бир бирден айырылмай, кёп олтуруучубуз, бирде сюелип да хапар айтыучубуз. Бизге ол такъыйкъала  кёп кёрюнмейдиле. Биз, жууукъ заманда, жыйырма алты жыл мындан алгъача, жыйылыргъа, бирге олтурургъа мурат этебиз. Ол  толур деген акъылдабыз.