Жандауурлукъ жумушла

Бу ыйыкъда Элбрус райондан Къабарты-Малкъар республикадан энчи аскер операциягъа къатышханлагъа кезиулю болушлукъ ашырылгъанды. Озгъан айда районну билим бериу учреждениялары «Сабий къолланы жылыуу» деген жандауурлукъ акциягъа тири къатышхандыла.

Окъуучуланы, студентлени бла сабий садлагъа жюрюген балачыкъланы аталарына бла аналарына уллу ыспас этерчады. Районну жаш тёлю арасыны келечилери бла Элбрус районда жашагъан жамауат да, хар замандача, бу ишге тири къатышхандыла.

Беш тонна ауурлугъу болгъан болушлукъ ашырылгъанды. Анга жылы кийимле, аш-азыкъ, кирсизлик ючюн керекли затла, дарманла жыйылгъандыла. Посылкалада сабийле кёллерин салып ишлеген суратла, жюрекден келген алгъышлары бла тилеклери жазылгъан открыткала, ыспас эм махтау сёзлерин жазгъан къагъытла да бар эдиле. «Къайсысы да болсун, Ата журтубузну къоруулай, къазауат этген аскерчи бизни къарындашыбызды, шуёхубузду, жашыбызды!» - дей эдиле болушлукъ келтиргенле.

- Хорлам бизни боллукъду! Биз, бу аламат юлгю бла ёсе келген сабийлени жюреклерини кёп ариу, аламат сезимлерин къозгъай, патриотла болургъа юйретебиз. Ала да болушлукъ керекде, артха турмай, Ата журтларын къорууларгъа хазыр боллукълары ишексизди, - дейдиле акцияны бардыргъанла бла Билим бериу управленияны келечилери.

Болушлукъ алыуну женгиллендириу амалла

Бу кюнледе Элбрус районну администрациясыны башчысыны биринчи орунбасары Толгъурланы Расул Структура подразделенияланы таматалары бла кенгеш бардыргъанды. Анда сюзюлген сорууладан бири энчи аскер операциягъа къатышхан аскерчилеге бла аланы юйюрлерине регион болушлукъну женгиллендириу болгъанды.

КъМР-ни Правительствосуну буйругъуна бла РФ-ни Экономика министерствосуну оноууна кёре, башда сагъынылгъан инсанлагъа къыралдан болушлукъ алыуну онгларын иги да женгил этер ючюн амалла къураргъа кереклиси сюзюлгенди.

1. Керекли документлени тизмеси къысхартыллыкъды.

2. Къагъытла жыйып, кеслери кёп жерлеге барып айланмазча, заявленияны электрон халда неда МФЦ-да берирге боллукъдула.

3. Къагъытланы сюзюуню бла алагъа кёре оноу къабыл этилиуню заманын къысхатрыргъа.

4. Болушлукъ тийишли юйюрле аны барысы да алырча онгла къураргъа.

Толгъурланы Расул къысха заманны ичинде бу жумушну кереклисича къурауну жууаплы адамлагъа буюргъанды.

Район жай кезиуге хазырды

Элбрус районну администрациясыны башчысы Отарланы Мухтар терроргъа къажау комиссияны кезиулю кенгешин бардыргъанды. Анда районда жашагъанланы тынчлыкъларын бла къоркъуусузлукъларын жалчытыуну юсюнден соруула сюзюлгендиле. Россей Федерацияда терроризмге къажау ниетлени комплекс планын 2024-2028 жыллада жашауда бардырылыууна энчи эс бурулгъанды. Кенгешде билдириу-пропаганда ишни Интернетде жангыртыргъа эмда жаш тёлюню арасында бу жаны бла профилактика жумушланы Терроргъа къажау комиссияны келечилери бла бирге къыстау бардырыргъа кереклиси тохташдырылгъанды. Спорт бла кюрешген жаш тёлюню арасында да быллай ишни къураргъа тийишлиди. Ол жумушха жамауат организацияланы бла дин ахлуланы да къошаргъа кереклиси чертилгенди.

Жай солуугъа келгенлени къоркъуусузлукъларын жалчытыр ючюн, этилирге тийишли амалла да сюзюлгендиле. Санатор-курорт мекямланы ол жаны бла хазырлыкъларын тинтирге кереклиси да белгиленнгенди. Дагъыда сабийлени жай солууларын бардырлыкъ мекямлада бла спорт объектледе терроргъа къажау хазырлыкъны жалчытыргъа тийишлисин энчи чертгендиле. Озгъан жылла бла тенглешдиргенде, сынамгъа кёре, районну тийресинде адамланы эм кёп келиучю, жыйылыучу жерлери да тохташдырылгъандыла.

Кенгешни ахырында Мухтар Магомедович сюзюлген сорууланы жалчытылыныуларын излегенди. Аланы тинтиу бла байламлы буйрукъланы жууаплы органлагъа бергенди. Алай бла район жай кезиуге хазырды, къоркъуусузлукъ жаны бла да жалчытылыныпды, дерге боллукъду.