Колумбияда къарыуларын сынарыкъдыла

Бу кюнледе Одинцово шахарда кикбоксингден Россейни биринчилиги ётгенди. Бу турнир Россейни халкъларыны бирлигини жылына аталгъанды. Анга Россейни 76 субъектлеринден 3000 гёжеф къатышхандыла, деп билдиредиле КъМР-ни Спорт министерствосундан. 
Эсеплеге кёре, 15-16-жыллыкъланы араларында «Фулл-контакт» жаны бла «алтынны» Саид Савкуев (45 кг.) алгъанды.  
Рамазан Курбанов (39 кг.) бла Дамир Алоев (57 кг.)  экинчи жерни алгъандыла. «Лоу-кикде» да Жангоразланы Шамиль (75 кг.), Рашид Тазов (63,5 кг.) эм Рамазан Мавлюдов (54 кг.) «кюмюш» къоллу болгъандыла. 
«Доммакъгъа» уа Хубийланы Муслим (60 кг.), Адальби Хутов (60 кг.), Эльдар Хуранов (71 кг.) эм Адам Хачетлов (63 кг.) тийишли болгъандыла.
Бу эришиуледе айырмалы болгъанла андан ары кикбоксингден Россейни жыйымдыкъ командасына кирип, Дунияны Колумбияда октябрьде бардырыллыкъ биринчилигине къатышырыкъдыла.