«Башха миллетли сабийле окъуна бизни тилибизни билирге сюедиле»

Элбрус районну Элбрус районда атларын айтдырып, сабийлени юйретиуге жашауларын жоралагъан устазла кёпдюле. Бюгюнлюкде  аладан бири Тырныауузну 3-чю номерли орта школуну малкъар тилден бла адабиятдан устазы Къалабекланы Исмайылны къызы Курданланы Иринады. Ол кеси да мени ушакъ нёгеримди.

- Ирина Исмайыловна, сиз ана тилибизни, маданиятыбызны бла адабиятыбызны сакълаугъа уллу къыйын саласыз. Бу сюймеклик къайдан келеди?

- Ана тилибиз – бизни миллет хазнабызды. Аны тас этген миллет, халкъ кеси да жокъ болады. Тил – ол миллетге байлагъан, аны къанынга сингдирген бир байлыкъды. Ёсе келген тёлюбюзге ана тилибизни сакълап, сюйдюралсакъ, билдиралсакъ, ол бек уллу насыпды. Заман бара-баргъаны бла, адам улуну сейирлери, жашаугъа кёз къарамлары да тюрленедиле. Алай къайсы бирибизни да миллетлик сезимибизни къозгъагъан ана тилибизди.

Огъурлу миллетими къадарына кёп сынаула тюшген эдиле. Алай не къыйын кезиулеринде да бизни бирикдирген, адамлыкъ, миллетлик шартыбызны да сакълатхан тилибиз болгъанды.Тыш жерледе да, онюч жылны ичинде, сагъыш этсек, ол бир ёмюр эди халкъыбызгъа, тилибизни, динибизни, маданият хазнабызны да сакълап къайталгъан ариу миллетибизни чексиз багъалайма. Аны себепли жюрегими теренинден келген сюймеклигим бла, хурметим бла да сабийлеге билдирирге итинеме.

Къайсы устазгъа да бу жумушда билеклик этген адам керек болады. Мени аллай ышаннган, акъыллы, халкъына кертичи адамым, мектебибизни таматасы Хутуйланы Шарафийни къызы Любовьду. Къайсы башламчылыгъыма да хар заманда кёл этдирип, бизни кеси кючюбюзге ийнандыргъан аллай адам. Аны ючюн анга бек ыразыма.

Ушакъны баргъаны 1 июньда басмаланырыкъды.