Кеслери ишлеп, башхалагъа да онг бергенлени кюню

Бу айны 26-чысында Россейде предпринимательствону кюню белгиленнгенди. Ол кеслери иш ачып, сатыу-алыу, абериле чыгъарыу, жумушла бла жалчытыу бла кюрешгенлени байрамыды. Анга жораланып бардырылгъан кенгешде гитче эмда орта предпринимательство не жаны бла да магъаналы болгъанын, адамланы жашауларын игилендириуге, регионлада эмда саулай къыралда экономиканы кючлендириуге уллу къошумчулукъ этгенин РФ-ни Правительствосуну Председатели Михаил Мишустин да чертгенди, дегендиле КъМР-ни Экономиканы айнытыу министерствосунда.

Тергеулеге кёре, бюгюнлюкде гитче эмда орта предпринимательлени саны бизни къыралда жети миллионнга жетгенди, саулай бёлюмде уа 19 миллиондан артыкъ адам ишлейди. Май айны биринчисине 1,5 миллион жангы субъект эсепге тургъанды, ол а былтыргъы кёрюмдюден 4,2 процентге уллуду.

Бизнес производствогъа, информациялы технологиялагъа, креатив индустриягъа тири барады. Вице-премьер белгилегенича, поручительство бла берилген хар бешинчи кредитни жарашдырыучу производстволада хайырланадыла.

«Гитче эмда орта предпринимательство» миллет проект бардырылгъан кезиуде беш миллиондан артыкъ предпринимательге болушлукъ берилгенди. Ол санда инвестициялагъа къоратырча учуз кредитле да.

Къыралгъа магъаналы бёлюмлеге, сёз ючюн, жарашдырыугъа, къонакъ юйле бла байламлы бизнесге, ИТ-ге, илмугъа эмда креатив индустриягъа аны багъасы Ара банкны ключевой ставкасындан 3,5 процентге азды. Кезиулю жумушлагъа деб а, банкла эмда МСП Корпорация да къатышып, быйыл июльда жангы кредит программа ишлеп башларыкъды. Аны проценти сагъынылгъан ставка тенгли боллукъду.

Энтта да бир болушлукъ мадар: кёп товар неда жумуш сатып алыучуланы заказларыны тёртден бири МСП-дан болургъа керекди. Быйылны аллындан бери эки триллиондан аслам сом багъасына абериле сатып алыннгандыла ол халда.
Уллу бизнес гитчеге ахчаны заманында тёлемей турса, анга Правительство къатышып мадар этеди. ФАС бла МСП Корпорация къошулуп къуралгъан энчи штаб ишни сюдге жетдирмей, тарыгъыуланы 60 процентин тамамларгъа онг тапхандыла.
Бизнесге Правительство урунуу жаны бла да себеплик этеди: кадрла бла байламлыкъла къураргъа, ахшы сынамланы хайырланыргъа, ИИ технологияланы сингдирирге болушады.

МСП бёлюм социал жаны бла да бек магъаналыды. Бюгюнлюкде СВО-ну ветеранларына, сабийлери болгъан предприниматель тиширыулагъа да энчи эс бурулады.

Россейни регионларында 400 «Мени бизнесим» ара ишлейди, алада эсепде 1,6 миллион хайырланыучу барды, предпринимательлеге 1,8 миллион жумуш берилгенди. Дагъыда Президентни буйругъу бла жюз техно эмда бизнес парк ачыллыкъды.

«Предпринимательле – шёндюгю тёлюню алчыларыдыла. Ала уллу кёллю болмагъан, кеслери иш къурагъан, продуктла, товарла чыгъаргъан, жумушла бла жалчытхан, жангы технологияланы сингдирген, сора налогла тёлеген адамладыла. Бюгюнлюкде предпринимательствогъа экономиканы бар бёлюмлеринде тюберге боллукъду. Къырал эмда регион властьла, финанс институтла эмда себеплик этиу арала бла бирге биз бизнесге ёсерге болушабыз, «Къыйматлы эмда конкуренциягъа кючлю экономика» миллет проектни жетишимли бардырабыз. Муратыбыз – адамланы къолайлыкъларын игилендириудю эмда регионну ышаннгылы айнытыуду. Кесигиз билесиз, шёндюгю дунияда энчи жууаплылыкъ изленнгенин. Мен а бизни предпринимательле не тюрлю къыйынлыкъла болсала да кеслерини сейирлерин къорууларгъа, урунуу коллективлеге къайгъырыргъа, инновацияланы сингдирирге хазыр болгъанларына ишексизме», - дегенди КъМР-ни экономиканы айнытыу министри Рахайланы Борис.