Жилекни кезиую жетгенди

Бизни республиканы бахчаларында жилек бишип башлагъанды. Биринчи тирлик къуру кесибизде угъай, тышында рыноклагъа да жибериледи, деп билдиргендиле КъМР-ни Эл мюлк министерствосундан.

Шёндю жилекни танг жетген сортларын жыядыла. Тирликни асламысы уа бир ыйыкъ чакълы озгъандан сора бишерикди. Регионда наныкъ культураланы ичинде бу татыулу тюрлюсю 56 процентни алады. Эсге сала айтсакъ, былтыр республикада 4,2 минг тонна жыйгъан эдиле. Быйыл да элчиле кёрюмдюню андан азайтмазгъа таукелдиле.

Жилекни адамла кеслери бахчаларында да ёсдюредиле: тирликни экиден бири ма аладанды. Энчи предпринимательле, мюлкле, эл мюлк товарла чыгъарыучула да артха къалмайдыла. Аны себепли, саулай Шимал Кавказда жилек ёсдюрюу жаны бла бизни республика алчыды; округда аны экиден бирин Къабарты-Малкъар береди.